“Ne kemi mbledhur prova që tregojnë se centralet bërthamore të Iranit janë shkatërruar dhe do të duhen vite për t’i rindërtuar ato”. Kështu tha drejtori i CIA-s, John Ratcliffe, i cili ishte në Situation Room me presidentin Donald Trump në kohën e sulmit amerikan, më 22 qershor.
Më herët, Irani shpalli fundin e “luftës 12-ditore”. Në këtë fazë, duket se armëpushimi ka arritur një pikë kthese, pas momenteve fillestare të pasigurta.
Gjëja e fundit që iranianët duan të bëjnë tani është pasurimi i uraniumit, ata nuk do ta ndërtojnë bombën për një kohë të gjatë, tha Donald Trump në një konferencë për shtyp me Sekretarin e Përgjithshëm të NATO-s, Mark Rutte, duke shtuar se “tani shkojmë shumë mirë me Teheranin“.
Sulmi në Fordow i dha fund luftës. Në thelb ishte e njëjta gjë si Hiroshima dhe Nagasaki, u shpreh presidenti amerikan.
Presidenti iranian, Masoud Pezeshkian, në një bisedë telefonike me Princin e Kurorës Saudite, Muhammad bin Salman, tha se Teherani është “gati të zgjidhë problemet me Shtetet e Bashkuara të Amerikës, bazuar në kuadrin ndërkombëtar”.
Ne nuk kërkojmë asgjë më shumë sesa të drejtat tona.
Ndërkohë, Parlamenti iranian (Majles) miratoi pezullimin e bashkëpunimit me Agjencinë Ndërkombëtare të Energjisë Atomike (IAEA). Kjo u raportua nga agjencia iraniane e lajmeve Fars.
Në një tjetër zhvillim nga konflikti në Lindjen e Mesme, të paktën 44 persona gjetën vdekjen në Gaza gjatë shpërndarjes së ndihmave. U raportua se forcat e IDF-së (ushtrisë izraelite) dhe dronët kanë hapur zjarr ndaj qindra palestinezëve në episode të ndara.
