Ushtria amerikane njoftoi se kreu sulme të reja ajrore kundër objektivave iraniane, pas goditjes me dronë dhe raketa ndaj një baze në Jordani që vrau dy ushtarë amerikanë, la një të zhdukur e plagosi katër të tjerë.
Sipas Komandës Qendrore të SHBA-ve, operacionet me urdhër të presidentit Donald Trump, synuan të “ndëshkojnë shpejt” Gardën Revolucionare Islamike.
Sulmet u përqendruan në provincën jugore Hormozgan, pranë Ngushticës së Hormuzit, duke goditur zona pranë Sirikut, Hajjabadit, Bandar Abbas dhe Ishullit Qeshm.
Media shtetërore iraniane raportoi për dëme në një uzinë energjie elektrike, tunele dhe ura, ndërsa u ndërpre trafiku në një autostradë kryesore drejt portit të Bandar Abbas.
Irani reagoi duke sulmuar me dronë kamikazë dy baza amerikane në Kuvajt: Camp Udairi dhe Ali Al Salem. U synuan depot e municioneve dhe sistemet e radarit Patriot.
Një bazë e Partisë së Lirisë së Kurdistanit pranë Irbilit në Irak u godit gjithashtu, duke plagosur tetë persona. Banorët e Irbilit raportuan shpërthime gjatë natës, ndërsa mbrojtjet ajrore u aktivizuan.
Autoritetet iraniane pretendojnë se sulmet amerikane kanë shkaktuar të paktën 50 viktima dhe mbi 500 të plagosur në tre javët e fundit, përfshirë tetë të vrarë në një sulm ndaj një ure të premten.
Që nga fillimi i konfliktit më 28 shkurt, janë vrarë 16 ushtarë amerikanë dhe mbi 430 janë plagosur. Vdekja e fundit e trupave amerikane u regjistrua pas sulmit në Jordani, ndërsa më herët viktima janë raportuar në Arabinë Saudite, Irak dhe Detin Arabik.
Sekretari i Mbrojtjes, Pete Hegseth, reagoi duke thënë:
Paçi fat heronj! Sakrifica e tyre vetëm sa e ngurtëson vendosmërinë tonë.
Udhëheqësi suprem iranian, Mojtaba Khamenei, paralajmëroi për “mësime të paharruara” nëse Amerika vazhdon sulmet, duke e cilësuar firmën e Trump-it, “të pavlerë”.
Ai deklaroi se Irani nuk do të zbatojë më angazhimet e marrëveshjes së përkohshme të armëpushimit të nënshkruar një muaj më parë, duke e çuar konfliktin drejt një përshkallëzimi të ri.
Ngushtica e Hormuzit, e cila para luftës përbënte rreth 20% të furnizimeve globale me naftë, është kthyer në epiqendrën e betejës.
