Raketës iu shkatërrua plotësisht struktura pak para nisjes së provës, ndërsa momenti dramatik është filmuar dhe po bën xhiron e rrjeteve sociale.
Fatmirësisht, ngjarja nuk ka shkaktuar viktima apo të lënduar, pasi asnjë anëtar i ekipit nuk ndodhej në zonën e rrezikut në momentin e shpërthimit. Megjithatë, dëmet materiale mbi anijen dhe infrastrukturën konsiderohen të rënda.
Sa i kushton SpaceX ky dështim?
Sipas analistëve të industrisë, ndërtimi dhe përgatitja e një rakete “Starship” vlerësohet të kushtojë rreth 100 milionë dollarë. Ndërkohë, kompleksi i Starbase – i cili është ndër më të avancuarit në botë – ka një kosto ndërtimi mbi 3 miliardë dollarë.
Vetë programi “Starship”, duke përfshirë raketat, pajisjet mbështetëse, personelin dhe logjistikën, ka kaluar tashmë shifrën e 5 deri në 7 miliardë dollarëve dhe pritet të arrijë në mbi 10 miliardë dollarë me përmirësimet e fundit.
Vlerësimet paraprake sugjerojnë se dëmi financiar nga incidenti i djeshëm mund të jetë disa miliardë dollarë, një goditje e konsiderueshme për kompaninë e Elon Musk.
SpaceX: Dështimet, pjesë e progresit
Edhe pse SpaceX nuk ka lëshuar ende një deklaratë të detajuar mbi shkaqet dhe kostot e incidentit, kompania njihet për filozofinë e saj të zhvillimit përmes eksperimentimit dhe testimeve të rrezikshme.
Vetë Elon Musk e ka theksuar vazhdimisht se dështimet e tilla janë të pashmangshme dhe të domosdoshme për përparimin teknologjik.
Megjithatë, ndërsa SpaceX përgatitet për misione gjithnjë e më ambicioze në hapësirë, përfshirë misionet e ardhshme drejt Hënës dhe Marsit, ngjarje të tilla shërbejnë si një kujtesë e qartë e sfidave dhe rreziqeve që mbart eksplorimi hapësinor.
