Andrea Kimi Antonelli u rikthye te suksesi në Formula 1 këtë të dielë, duke fituar Çmimin e Madh të Belgjikës pas një paraqitjeje dominuese nga starti deri në vijën e finishit.
Piloti italian i Mercedes e nisi garën nga “pole position” dhe administroi në mënyrë perfekte avantazhin. Në xhirot e para ai pati presionin e Charles Leclerc, por e neutralizoi pa vështirësi sulmin e pilotit të Ferrarit, duke ruajtur kreun deri në fund.
Leclerc u detyrua të kënaqej me vendin e dytë, ndërsa Max Verstappen kompletoi podiumin me vendin e tretë. Lewis Hamilton e mbylli garën në pozicionin e katërt, por britaniku u penalizua me pesë sekonda pasi u shpall fajtor për incidentin në start që detyroi George Russell të braktiste garën.
Oscar Piastri u klasifikua i pesti, ndërsa një nga surprizat e garës ishte Isack Hadjar, i cili u ngjit deri në vendin e gjashtë pasi e kishte nisur nga pozicioni i 21-të. Lando Norris realizoi gjithashtu një rikuperim të shkëlqyer, duke e përfunduar garën në vendin e shtatë pasi startoi i 13-ti.
LEXO EDHE: F1/ Lëklerk ndryshon historinë dhe i përgjigjet kritikave: Nuk u bëra pilot i keq brenda natës!
Me këtë fitore, Antonelli forcon pozitat në krye të renditjes së përgjithshme të kampionatit. Piloti i Mercedes kryeson tashmë me 204 pikë, 45 më shumë se Lewis Hamilton dhe 50 më shumë se shoku i skuadrës, George Russell.
Formula 1 nuk do të ndalet gjatë, pasi pas vetëm një jave pilotët do të rikthehen në pistë për Çmimin e Madh të Hungarisë, sfida e radhës e sezonit.
