Microsoft-it i është dashur të ndalojë planet e tij ndërsa Google lufton një betejë ligjore kundër Epic Games. Microsoft planifikoi të shtonte një veçori të re në aplikacionin Xbox për pajisjet Android në nëntor; aftësinë për të blerë dhe luajtur lojëra Xbox direkt nga aplikacioni Xbox. Sipas drejtoreshës ekzekutive të Microsoft dhe Xbox, Sarah Bond, funksioni i ri është gati për t’u lançuar, por është bllokuar sepse Google po kërkon një pauzë ndërsa apelon një vendim ligjor që do ta lejonte pikërisht këtë.
Google po apelon vendimin në rastin “Epic kundër Google”, i cili zbuloi se dyqani i aplikacioneve Android, Google Play, kishte një monopol të paligjshëm. Google do të duhet të lejojë dhe të shpërndajë dyqane aplikacionesh të palëve të treta brenda Google Play, duke u dhënë dyqaneve të aplikacioneve të palëve të treta qasje në të gjitha aplikacionet e Google Play. Meqenëse Google apeloi vendimin, Microsoft nuk është në gjendje të lansojë alternativën e vet për Xbox Store.
“Në Xbox, ne duam t’u japim lojtarëve më shumë zgjedhje se si dhe ku luajnë, duke përfshirë mundësinë për të luajtur dhe për të blerë lojëra direkt nga aplikacioni Xbox”-shkroi Sarah Bond në platformën e mediave sociale Bluesky. “Për shkak të një ndalimi të përkohshëm administrativ të dhënë së fundmi nga gjykatat, aktualisht nuk jemi në gjendje t’i lansojmë këto funksione siç ishte planifikuar. Ekipi ynë ka funksionalitetin e ndërtuar dhe gati për të nisur sapo gjykata të marrë një vendim përfundimtar”-shtoi ajo.
Microsoft tha së fundmi se ka hapur një bazë kërkimore dhe zhvillimi të inteligjencës artificiale dhe robotikës në Minato Ward të Tokios, si pjesë e investimit të saj në Japoni. Në bashkëpunim me universitetet japoneze dhe institutet kërkimore, si dhe kompanitë si Kawasaki Heavy Industries dhe Nissan Motor, gjiganti amerikan i teknologjisë synon të kombinojë AI me fuqinë e Japonisë në robotikë dhe t’i vërë rezultatet në përdorim praktik. Microsoft ka baza kërkimore për AI dhe mësimin e makinerive në vende të ndryshme anembanë botës.
