Jennifer Lopez ka ndezur sërish spekulimet për marrëdhënien e saj me ish-bashkëshortin Ben Affleck, pasi bëri një deklaratë që shumë fansa e kanë interpretuar si një thumbim të drejtpërdrejtë ndaj aktorit hollivudian.
Gjatë një paraqitjeje në emisionin “Watch What Happens Live” me Andy Cohen, ylli i muzikës dhe kinemasë foli hapur për jetën e saj sentimentale teksa promovonte komedinë romantike “Office Romance”.
Kur u pyet nëse beson se dashuria e saj më e madhe është ende përpara, Jennifer nuk hezitoi aspak në përgjigjen e saj.
Mendoj se po. Dashuria ime më e madhe është përpara meje, 100 për qind. Pa asnjë dyshim
-u shpreh ajo.
Deklarata ka tërhequr menjëherë vëmendjen e mediave, pasi vjen më pak se dy vite pas ndarjes nga Ben Affleck. Çifti u martua në vitin 2022, por Lopez paraqiti kërkesën për divorc pikërisht në përvjetorin e dytë të martesës së tyre. Procesi u finalizua në fillim të vitit 2025.
Në të njëjtën intervistë, këngëtarja u pyet edhe se cila është gjëja më romantike tek ajo. Përgjigjja e saj ishte po aq e sigurt:
Gjithçka. Unë jam shumë romantike.
Kjo nuk është hera e parë që Jennifer bën komente që fansat i lidhin me ish-partnerin e saj. Gjatë një interviste të mëparshme me Jimmy Kimmel, ajo pranoi se po e shijon jetën si beqare dhe madje tha se do të donte ta kishte marrë këtë vendim më herët.
Duhej ta kisha bërë më shpejt. I kam bërë gjërat gabim gjatë gjithë kohës, më besoni
-deklaroi ajo mes të qeshurash.
Lopez shtoi se aktualisht ndihet shumë mirë me statusin e saj dhe nuk ka ndërmend të nxitojë drejt një lidhjeje të re. Megjithatë, ajo la të hapur mundësinë që dashuria të trokasë sërish në të ardhmen.
Një ditë do të gjej dikë, nëse është mjaftueshëm i mirë
-tha artistja.
Ndërkohë, Jennifer vazhdon të jetë në qendër të vëmendjes për filmin e saj të ri “Office Romance”, ku luan përkrah Brett Goldstein. Kimia mes tyre ka nxitur thashetheme të shumta, ndërsa vetë aktorët kanë folur me superlativa për bashkëpunimin dhe raportin e tyre profesional.
Pavarësisht zhurmës rreth jetës së saj private, Jennifer Lopez duket më e fokusuar se kurrë te karriera dhe kapitulli i ri që ka nisur pas divorcit, duke lënë të kuptohet se historia e saj më e bukur e dashurisë mund të mos jetë shkruar ende.
