Alfonso Herrera ka emocionuar fansat me rrëfimin e tij më të fundit për ribashkimin me Anahín, duke treguar se intervista mes tyre ishte shumë më tepër sesa një takim televiziv. Ish-ylli i RBD pranoi se prej kohësh ndiente se i detyroheshin njëri-tjetrit një bisedë të sinqertë dhe se pikërisht për këtë arsye insistoi që këngëtarja të ishte pjesë e projektit të tij të ri.
Aktori meksikan, i cili së fundmi ka debutuar si moderator me serialin “Encuentros sin Fronteras”, foli për përvojën gjatë një interviste për mediat meksikane, ku zbuloi se episodi me Anahín ishte një nga më të veçantët për të.
Na mungonte kjo bisedë. Ishte një mundësi për t’u ritakuar, për të kujtuar të kaluarën dhe për të folur për gjithçka që kemi përjetuar
-u shpreh Herrera, duke lënë të kuptohet se ribashkimi mes tyre kishte një domethënie të veçantë emocionale.
Fjalët e tij prekën menjëherë fansat e RBD, të cilët prej vitesh kanë ndjekur marrëdhënien profesionale dhe miqësinë mes dy artistëve.
“Encuentros sin Fronteras” është një projekt i ri që transmetohet në Disney+ dhe ESPN, ku Alfonso Herrera zhvillon biseda me figura të njohura nga bota e artit, sportit dhe kulturës.
Mes të ftuarve janë Diego Boneta, Kaká, Sergio “Kun” Agüero, Hugo Sánchez dhe Guillermo Arriaga, por episodi me Anahín është konsideruar nga publiku si një nga më tëpriturit.
Aktori tregoi se përgatitja për çdo intervistë kërkonte shumë punë dhe përkushtim, pasi dëshironte që çdo bisedë të ishte sa më autentike.
Duhej të njihja historinë e secilit, fillimet e tyre dhe të krijoja një atmosferë ku të ndiheshin të lirë për të folur
-tha ai.
Sipas Herrerës, qëllimi nuk ishte thjesht të bënte pyetje, por të krijonte një hapësirë ku të ftuarit të ndiheshin rehat për të ndarë histori personale, emocione dhe kujtime që publiku nuk i kishte dëgjuar më parë.
Përveç projektit të ri, Alfonso Herrera zbuloi se po hyn edhe në një fazë tjetër të rëndësishme të karrierës së tij. Ai ka nënshkruar një marrëveshje me “Sony Pictures Television” për të zhvilluar dhe drejtuar projekte të reja, megjithëse nuk mund të japë ende shumë detaje.
Është hapi natyral. Fillimisht zvarritesh, pastaj ecën, vrapon dhe në fund arrin aty ku dëshiron
-u shpreh ai.
Megjithatë, për shumë fansa, momenti më i bukur mbetet ribashkimi i tij me Anahín. Pas kaq shumë vitesh, dy ish-yjet e RBD u ulën sërish përballë njëri-tjetrit, duke kujtuar rrugëtimin e tyre dhe duke dëshmuar se lidhjet e krijuara ndër vite mund të mbeten po aq të forta edhe pas kalimit të kohës.
