Një profesor mjekësie që vështirë se njihet në arenën politike, propozohet për të formuar një qeveri të re në Serbi. Kjo në kohën kur vendi po përballet me një krizë për shkak të protestave masive kundër korrupsionit. “Detyra e endokrinologut, Djuro Macut do të jetë të vazhdojë të ruajë paqen dhe stabilitetin duke treguar tolerancë”, tha presidenti Aleksander Vuçiç në një konferencë shtypi në Beograd.
Kryeministri i mëparshëm, Milos Vuçeviç, njoftoi dorëheqjen në janar, nën presionin e protestave, një veprim që shihet gjerësisht si taktik. Që nga shembja e tendës së stacionit në qytetin verior serb, Novi Sadi, që shkaktoi vdekjen e 16 personave, Serbia është mbërthyer nga një valë protestash që tani është përhapur në pjesë të mëdha të vendit dhe e ka zhytur udhëheqjen e Vuçiçit në një krizë të përmasave të paprecedenta.
Organizatorët e demonstratave, marshimeve dhe pushtimeve të universiteteve kanë fajësuar paaftësinë dhe korrupsionin në qeveri për tragjedinë në Novi Sad. Ata po kërkojnë reforma sistematike për të eliminuar korrupsionin dhe keqmenaxhimin përmes shtetit të së drejtës.
Vuçiç akuzoi sërish lëvizjen protestuese se po kontrollohet nga jashtë dhe se po kërkon një grusht shteti. Ai nuk ka paraqitur asnjë provë. Ish-kryeministri Vuçeviç konsiderohej një ndjekës besnik i presidentit, i cili të gjitha vendimet e rëndësishme i merr vetë.
Pasardhësi i caktuar Macut, i lindur në vitin 1963, deri më tani është njohur vetëm si një mbështetës i hapur i Vuçiçit. Sipas kushtetutës serbe, Macut ka afat deri më 18 prill për të formuar një qeveri të re dhe për ta miratuar atë nga parlamenti. Miratimi konsiderohet formalitet.
Dhjetëra çiklistë serbë po përshkojnë 1.300 kilometra rrugë drejt Parlamentit Europian në Strasburg, për të tërhequr vëmendjen në lidhje me fushatën e vendit të tyre kundër korrupsionit. Fillimisht u ndalën në kryeqytetin hungarez, Budapest, pasi më 3 prill u nisën nga Novi Sadi ku shembja e një strehe betoni në stacionin e trenit, vrau 16 vetë e nxiti protesta prej nëntorit të kaluar. Protestuesit akuzojnë qeverinë për korrupsion.
