Në Indonezinë vullkanike, në ishullin magjik të Javas, ndodhet një vullkan ende aktiv që lëshon një dukuri të rrallë, një “llavë blu” që magjeps dhe frikëson njëkohësisht. Pamja më mahnitëse ndodh gjatë natës, pasi gjatë ditës ajo është më pak e dukshme. Krateri i vullkanit Kawah Ijen ndriçohet nga ngjyra e tij e pazakontë blu, duke krijuar një spektakël unik. Ky vullkan është njëkohësisht i bukur dhe i rrezikshëm. Ngjyra e ndezur elektrike që tërheq njerëzit është në të vërtetë rezultat i gazrave të squfurit që digjen me temperatura të larta, një mrekulli natyrore që fshihet pas një rreziku vdekjeprurës.
Ndërkaq, duke u ngritur nga Oqeani Paqësor si një skenë e dalë nga një roman fantastiko-shkencor, Aogashima është një nga vendet më të largëta dhe më misterioze të banuara në Japoni. Ky ishull vullkanik ndodhet mbi 350 kilometra në jug të Tokios dhe ndonëse administrativisht i përket kryeqytetit, ngjan me një botë krejt tjetër. Me përmasa vetëm 3.5 km të gjatë dhe 2.5 km të gjerë, Aogashima është shtëpia e rreth 170 banorëve, duke qenë fshati më pak i populluar në Japoni. I formuar nga dy kratera të mbivendosur vullkanikë, të rrethuar nga shkëmbinj të lartë që bien drejt detit Filipin, Aogashima është dëshmi e fuqisë shekullore të natyrës.
