Ushtria amerikane njoftoi se ka kryer një raund të ri sulmesh kundër objektivave ushtarake iraniane, pas paralajmërimit të presidentit Donald Trump se Teherani do të goditej “shumë rëndë” nëse përpjekjet për një marrëveshje paqeje dështojnë.
Komanda Qendrore e SHBA-ve (CENTCOM) deklaroi se forcat amerikane ndërmorën “sulme shtesë vetëmbrojtëse” sipas udhëzimeve të komandantit të përgjithshëm.
Objektivat e goditura përfshinin kapacitetet iraniane të mbikëqyrjes, sistemet e komunikimit dhe vendet e mbrojtjes ajrore në të gjithë Iranin.
Sipas komandës, asetet e Marinës, Forcave Ajrore dhe Korpusit të Marinës Amerikane përdorën municione të drejtuara me preçizion kundër objektivave që përbënin kërcënim për forcat amerikane dhe anijet tregtare ndërkombëtare në ujërat rajonale.
Sulmet janë në përgjigje të agresionit të pajustifikuar dhe të vazhdueshëm të Iranit. Forcat amerikane mbeten vigjilente, vdekjeprurëse dhe të gatshme. Të nisura më 12:15 të mëngjesit sipas Orës Standarde Arabe (AST), sulmet goditën objektiva të shumta brenda Iranit.
Presidenti Trump tha se Amerika do të vazhdojë veprimet ushtarake, paralelisht me përpjekjet diplomatike.
Ne do t’i sulmojmë ata, do t’i sulmojmë shumë fort.
Trump përmendi rrëzimin e një helikopteri amerikan Apache nga Irani në Ngushticën e Hormuzit. Ai shtoi se Uashingtoni mbetet i përkushtuar për një marrëveshje kuptimplotë me Teheranin, që “Irani të mos pajiset me armë bërthamore”.
Po ashtu, pretendoi se fshehurazi, SHBA-të tërhoqën “miliona fuçi naftë” nga Irani, duke thënë se ky operacion ndihmoi në parandalimin e rritjes së ndjeshme të çmimeve globale të naftës së papërpunuar.
Sekretari i Mbrojtjes, Pete Hegseth, paralajmëroi se Irani do të ishte “i pamatur” të sfidonte më tej Shtetet e Bashkuara pas veprimeve të fundit ushtarake.
Tani për tani, ato janë sulme mbrojtëse për të siguruar që ne të mbrojmë popullin tonë.
Hegseth theksoi se presidenti Trump mbetet i përqendruar në sigurimin e një marrëveshjeje që do ta pengonte përgjithmonë Iranin të pajiset me armë bërthamore.
