Fitimi i të ardhurave ka një ndikim të thellë në mirëqenien mendore të njerëzve, veçanërisht kur individët krahasojnë veten me të tjerët përreth. Ky fenomen ndikon veçanërisht tek meshkujt, të cilët shpesh përballen me gjykim dhe ndjesi të ulëta vetëvlerësimi kur nuk janë ata që sigurojnë të ardhurat kryesore në familje.
“Është pak e dhimbshme për krenarinë kur gruaja jote është ajo që sjell të gjitha të ardhurat,” shprehet Dave, një baba që qëndron në shtëpi. Ndërsa Tomi, një tjetër pjesëmarrës në një studim mbi rolet gjinore dhe të ardhurat, shton: “Unë jam, si të thuash, djalë i djemve… u thua që je në shtëpi dhe ata të shikojnë si të ishe më pak burrë.”
Ky studim i thelluar përfshinte intervista me burra dhe gra për të eksploruar se si ndikon dinamika e fitimit të të ardhurave nga gratë në marrëdhënie dhe perceptimin publik. Të dhënat tregojnë se, edhe pse një numër gjithnjë në rritje i grave po sigurojnë më shumë të ardhura se partnerët e tyre meshkuj, ky ndryshim shoqërohet me sfida të thella emocionale dhe sociale për burrat.
Në thelb të kësaj ndjeshmërie qëndron lidhja e fuqishme mes të ardhurave dhe pushtetit. Shpesh, shoqëria ka supozuar që burri duhet të jetë kryefamiljari. Kur kjo pritshmëri nuk përmbushet, disa burra ndihen të pafuqishëm, të pasigurt dhe të gjykuar gjë që ndikon negativisht në shëndetin e tyre mendor dhe mund të rrisë rrezikun për depresion dhe probleme në marrëdhënie, përfshirë ndarjen dhe divorcin.
Statistikat tregojnë se burrat e papunë raportojnë nivele më të larta të depresionit sesa gratë e papuna. Megjithëse në shumicën e çifteve të martuara me fëmijë burrat ende fitojnë më shumë, gratë kryejnë më shumë punë shtëpiake dhe kujdesen më tepër për fëmijët. Kjo ndodh jo vetëm për shkak të pritshmërive gjinore, por shpesh edhe për arsye ekonomike në rastet kur karriera e njërit prej partnerëve është më fitimprurëse, zakonisht femrat kalojnë në role me kohë të pjesshme.
Për më tepër, edhe kur gratë fitojnë më shumë, ato vazhdojnë të mbajnë barrën më të madhe të punëve të shtëpisë. Nga ana tjetër, burrat shpesh ndihen të pasigurt dhe më pak të kënaqur nëse partnerja e tyre ka të ardhura më të larta.
Ndikimi i kësaj dinamike është i vërtetë dhe serioz. Studimet kanë zbuluar se ndryshimi i roleve tradicionale mund të ndikojë negativisht në vetëvlerësimin dhe ndjenjën e identitetit te burrat. Por sa serioz është ky problem në të vërtetë? Dhe si mund të ndihmohen burrat të përshtaten me këto realitete të reja?
Tabuja për burrat që flasin hapur për ndjesitë e tyre lidhur me këto role të reja është ende e fortë. Edhe kur ndihen mbështetës të karrierës së partnereve, shumë prej tyre vuajnë në heshtje për shkak të presionit të roleve tradicionale të maskulinitetit.
