Anglishtja po njihet gjerësisht si gjuha ‘de facto’ globale, duke shërbyer si mjeti kryesor i komunikimit mes atyre që nuk ndajnë një gjuhë amtare të përbashkët. Siç edhe dihet është gjithashtu gjuhë dominuese në shumë vende, ku funksionon ose si gjuhë kryesore, ose si gjuhë dytësore e përdorur gjerësisht.
Rezultatet bazohen në një mesatare trevjeçare të testimeve të mbi 2.1 milion të rriturve në 116 vende, ku anglishtja nuk është gjuha dominuese, të mbledhura përmes testit EF SET në vitin 2023.
Holanda regjistroi pikët më të larta me 636, e ndjekur nga Norvegjia me 610, vende ku anglishtja është thellësisht e integruar në jetën e përditshme, në arsim e në media.
Singapori doli i treti në renditje, vendi me performancën më të lartë në Azi, falë sistemit arsimor me bazë anglishten, politikave kombëtare si fushata “Speak Good English”, si dhe statusit të tij si një nga qendrat kryesore financiare në botë.
Në përgjithësi, vendet europiane zunë të gjitha nëntë vendet me vlerësimin “Shumë lartë” të aftësive në anglisht. Ndërkohë, ato afrikane e të Lindjes së Mesme përbënin pesë vendet e fundit, me Jemenin që kishte rezultatin më të ulët.
Niveli global i njohjes së anglishtes ka shënuar rënie për të katërtin vit radhazi. Rreth 60% e vendeve të përfshira në indeks kanë marrë këtë vit rezultate më të ulëta krahasuar me vitin e kaluar.
Duhet theksuar se testi EF SET ka një prirje drejt pjesëmarrësve të interesuar në mësimin e gjuhëve dhe te të rinjtë, çka ndikon në profilin e përgjithshëm të të testuarve.
Sipas raportit, Shqipëria renditet në kategorinë “Aftësi mesatare” me një rezultat prej 533 pikësh, duke u pozicionuar në vendin e 43-të.
Ky rezultat reflekton një nivel të qëndrueshëm të njohjes së anglishtes, veçanërisht mes brezit të ri, i cili e përdor gjerësisht gjuhën në arsim, në media e teknologji po ashtu.
