Vetëm pak ditë përpara se të përballej me drejtësinë për akuza shumë të rënda, Marius Borg Højby, djali i adoptuar i princit të kurorës së Norvegjisë, është vënë sërish në pranga nga policia e Oslos.
Arrestimi u krye të dielën në mbrëmje, pas një incidenti të ri që e fut 29-vjeçarin në një tjetër kapitull të errët penal.
Sipas autoriteteve, Højby dyshohet për sulm ndaj një gruaje, kërcënime me thikë dhe shkelje të një urdhri kufizues, akuza që rëndojnë ndjeshëm pozitën e tij ligjore. Departamenti i Policisë së Oslos e konfirmoi ndalimin përmes një deklarate zyrtare të hënën, duke theksuar se ngjarja ka ndodhur vetëm dy ditë para nisjes së procesit gjyqësor ndaj tij.
I riu pritet të paraqitet këtë të martë para Gjykatës së Qarkut të Oslos, ku përballet me plot 38 akuza penale. Dosja përfshin katër akuza për përdhunim, disa raste dhune fizike dhe kërcënime ndaj ish-partnereve të tij.
Prokuroria ka kërkuar paraburgim katër-javor, duke argumentuar se ekziston rrezik real për përsëritje të veprave penale dhe presion ndaj viktimave.
Burime nga hetimi bëjnë me dije se Højby ka pranuar disa shkelje më të lehta, por ka mohuar me forcë akuzat më të rënda, veçanërisht ato që lidhen me dhunën seksuale. Ndërkohë, disa ish-partnere kanë depozituar padi civile, ndërsa një vendim gjykate i ndalon atij çdo kontakt me to.
Nëse shpallet fajtor, ai përballet me një dënim që mund të arrijë deri në 16 vite burg, sipas ligjeve norvegjeze. Procesi pritet të zgjasë deri në mesin e marsit dhe ka zgjuar interes të jashtëzakonshëm në opinionin publik, jo vetëm për shkak të akuzave të rënda, por edhe për lidhjen e tij me familjen mbretërore.
Situata bëhet edhe më e ndjeshme për oborrin mbretëror norvegjez, pasi së fundmi dokumente të deklasifikuara nga Departamenti Amerikan i Drejtësisë kanë zbuluar kontakte të shpeshta të nënës së tij, Princeshës së Kurorës Mette-Marit, me Jeffrey Epstein gjatë viteve 2011–2014.
Edhe pse këto zbulime nuk kanë lidhje direkte me çështjen penale të Højbyt, ato kanë shtuar edhe më shumë presionin dhe vëmendjen mediatike ndaj familjes mbretërore.
