Nëse keni ndjerë se gjithçka po përkeqësohet, nga shërbimet në restorante, kohëzgjatja e dorëzimeve online apo ndihma ndaj klientitm nuk jeni të vetëm. Ky fenomen ka një emër të ri ekonomik: “Skimpflation”. Ndryshe nga inflacioni klasik, ku çmimet rriten për të njëjtin produkt, skimpflation ndodh kur bizneset fillojnë të ofrojnë më pak për të njëjtën çmim, shpesh në mënyra të vështira për t’u matur. Është kur marrim më pak shërbim, cilësi më të ulët apo përvojë të reduktuar, pa e kuptuar menjëherë. Termi u popullarizua nga ekonomisti Greg Rosalsky dhe që atëherë është bërë një temë kyçe në raportet e konsumatorëve në SHBA dhe Europë. Për shembull:
- Kompanitë ajrore ruajnë çmimet e biletave, por ofrojnë më pak ushqim ose nuk përfshijnë më bagazhin në çmimin bazë.
- Hotelet ruajnë çmimet, por pastrimi i dhomës është bërë opsional apo vetëm pas kërkesës.
- Restorantet ofrojnë porcione më të vogla ose kohë më të gjatë pritjeje, ndërkohë që menutë nuk ndryshojnë.
“Skimpflation” është një strategji e heshtur për të kursyer kosto, por me pasoja të mëdha në cilësinë e përvojës së konsumatorit. Ndryshe nga “shrinkflation” (ku paketohet më pak produkt në të njëjtën paketim), kjo formë e re e inflacionit është më e vështirë për t’u identifikuar sepse lidhet me ndjesinë dhe përjetimin. Sipas një studimi të fundit nga Harvard Business Review:
Mbi 68% e konsumatorëve e perceptojnë këtë rënie të cilësisë në shërbime që nga viti 2022, por shumë prej tyre nuk dinë si ta artikulojnë ose raportojnë.
Ky fenomen ngre edhe pyetje etike mbi bizneset: A është e ndershme të ruash çmimin, por të ulësh vlerën e ofruar? Dhe në një kohë ku konsumatorët janë më të vetëdijshëm dhe të ndjeshëm ndaj përvojës së tyre, skimpflation mund të jetë më shumë se një kursim: mund të jetë një kthesë drejt humbjes së besimit.
