Kushdo që është rritur duke parë filma të animuar, padyshim që ka adhuruar Mickey Mouse, personazhi që ka rritur shumë breza fëmijësh dhe që është mjaft i kërkuar edhe sot. Mickey Mouse feston sot 93-vjetorin. Artistët që e kanë vizatuar Mickey-n gjatë viteve e kanë quajtur atë si “alter ego” të Walt Disney dhe kanë thënë se ai “përfaqëson botën e animacionit”. Më poshtë keni 10 fakte për miun e famshëm.
Mickey Mouse bëri debutimin e tij më 18 nëntor 1928, në filmin e shkurtër të animuar “Steamboat Willie” në teatrin ”Colony” në New York.
Ai film shënoi edhe debutimin publik të Minnie Mouse. Të dy Minnie dhe Mickey ishin shfaqur më parë në “Plane Crazy”, një film i shkurtër që u shpërnda pas “Steamboat Willie”. “Steamboat Willie” ishte filmi i parë vizatimor në botë me tinguj të sinkronizuar dhe paraqiste zërin e vetë Walt Disney. Në atë kohë, një film vizatimor i Mickey Mouse mund të përfshinte më shumë se 10 000 vizatime për një film shtatë minuta e gjysmë.
Më shumë se 100 filma vizatimorë të Mickey Mouse u prodhuan gjatë viteve 1930 dhe u shfaqën në kinema, së bashku me filma artistikë, filma lajmesh, seri dramash dhe komedi. Padyshim, pjesa më e suksesshme e mallrave të Mickey ishte ora ikonë e Mickey Mouse. Duke debutuar në qershor 1933, më shumë se 2,5 milionë orë u shitën në dy vitet e para të prodhimit.
Mickey bëri paraqitjen e tij të parë në filmin me ngjyra në “The Band Concert” në 1935. Dorezat e bardha të Mickey u shfaqën për herë të parë në vitin 1929 “When the Cat’s Away”. Ndërsa mund të jeni të njohur me miqtë e Mickey si Donald dhe Goofy, ai gjithashtu ka një familje mjaft të madhe!
Nipat e tij Morty dhe Ferdie mund të jenë më të njohurit, por Mickey gjithashtu ka më shumë se një duzinë kushërinj, xhaxhallarë dhe gjyshër, duke përfshirë xhaxha Maxwell, një profesor kolegji, kushëririn Digger, një fermer australian dhe xhaxha Louie, një kuzhinier francez.
Për nder të ditëlindjes së tij të 60-të, Mickey Mouse iu dha një vend në Institutin Smithsonian. ‘Walt Disney’ ka thënë se ylli i filmit pa zë, Charlie Chaplin, ishte një nga frymëzuesit për personazhin e Mickey Mouse.
Rikujtojmë, se së fundmi kompania “Netflix” ka tejkaluar “Walt Disney” në vlerë për herë të parë në një vit. Parakalimi është i lidhur me dobësinë e aksioneve të “Mickey Mouse” në Wall Street, ku humbën pas zhgënjimit për rritjen e abonentëve “Disney +”. Netflix ka një kapital tregu prej 291 miliardë dollarësh pas një rritjeje prej 27% që nga fundi i korrikut, nga 288.7 miliardë të Disney.
