Walt Disney ka arritur një marrëveshje me aktoren Gina Carano, duke mbyllur mosmarrëveshjen ligjore që nisi pas largimit të saj nga seriali “The Mandalorian”, ka konfirmuar një zëdhënës i Lucasfilm.
Carano u hoq nga seriali në vitin 2021 për shkak të postimeve në rrjetet sociale, të cilat kompania i cilësoi “të neveritshme dhe të papranueshme”, duke e akuzuar për poshtërim të njerëzve bazuar në identitetin kulturor dhe fetar.
Në vitin 2024, aktorja paditi Disney për pushim të padrejtë nga puna dhe diskriminim gjinor, duke argumentuar se u penalizua për shprehjen e pikëpamjeve konservatore, ndërsa kolegët meshkuj që shprehën mendime politike nuk u përballën me pasoja.
Pas përfundimit të kësaj padie, mezi presim të gjejmë mundësi për të bashkëpunuar me Carano në të ardhmen e afërt
-tha Lucasfilm në një deklaratë.
Në platformën X, Carano e përshkroi marrëveshjen si “rezultatin më të mirë për të gjitha palët”, duke falënderuar Elon Musk për mbështetjen “pa kërkuar asgjë në këmbim”.
Aktorja ka marrë kritika edhe më parë për postimet e saj, duke përfshirë talljen e mbajtjes së maskave gjatë pandemisë COVID-19 dhe përsëritjen e pretendimeve të rreme për mashtrim zgjedhor në zgjedhjet presidenciale amerikane të vitit 2020.
