Mbi 100 mijë persona kanë ikur nga luftimet kufitare më të përgjakshme mes Tajlandës dhe Kamboxhias në dekadë, siç raporton Bangkoku, mes shtimit të thirrjeve ndërkombëtare për ndalimin e armiqësive. Mosmarrëveshjet e vjetra kufitare, dje u përshkallëzuan në luftime intensive me artileri, tanke e trupa ushtarake në fushëbetejë. Këshilli i Sigurimit i Kombeve të Bashkuara sot pritet të mbajë një takim urgjent për krizën.
Ministria e Brendshme e Tajlandës raportoi se mbi 100 mijë njerëz nga katër provinca kufitare janë larguar në 300 zona të përkohshme strehimi, teksa numri i viktimave është rritur në 15 dhe i të plagosurve në 46. Autoritetet e Kamboxhias nuk i kanë publikuar të dhënat e tyre. Në qytezën Samraong të Kamboxhias, rreth 20 kilometra larg kufirit, gazetarët raportuan zhurma artilerie në mëngjes.
Disa familje u panë duke mbledhur gjërat e tyre dhe u larguan me makinë, bashkë me fëmijët.
Jetoj shumë afër kufirit. Frikësohemi sepse ata nisën prapë sulmet, vuri në dukje Pro Bak, 41 vjeç për agjencinë e lajmeve AFP.
Ai është larguar me gruan dhe fëmijët e tij për t’u strehuar në një tempull budist.
Nuk e di se kur do të mund të kthehemi në shtëpi.
Kryeministri i Malajzisë, Anwar Ibrahim, shteti i të cilit kryeson bllokun rajonal ASEAN, deklaroi se ka biseduar me kryeministrat e të dy shteteve dhe bëri thirrje për armëpushim e dialog. Luftimet shënojnë një përshkallëzim dramatik në konfliktin e gjatë mes këtyre dy vendeve fqinje, destinacione për miliona turistë të huaj e që ndajnë një kufi prej 800 kilometrash.
Dhjetëra kilometra kontestohen dhe për ato toka, palët kanë luftuar në periudhën 2008-2011, duke lënë 28 viktima e mijëra persona u detyruan që të zhvendosen. Një gjykatë e Kombeve të Bashkuara e ka zgjidhur këtë çështje, por kriza aktuale ka shpërthyer në maj, kur një ushtar i Kamboxhias mbeti i vrarë në përleshjet e reja.
