Komisioni Evropian ka shprehur shqetësim lidhur me njoftimin e presidentit amerikan, Donald Trump, për tërheqjen e SHBA-së nga Organizata Botërore e Shëndetësisë (OBSH).
Në ditën e tij të parë pas kthimit në Shtëpinë e Bardhë, Trump ka lëshuar një urdhër ekzekutiv për të nisur procesin e tërheqjes nga OBSH-ja, duke përsëritur këtë veprim për herë të dytë brenda pesë viteve, raporton AP.
LEXO EDHE: ‘Ka kërkuar fonde të padrejta’, Donald Trump urdhër ekzekutiv për tërheqjen e SHBA-së nga OBSH
“Nëse duam të jemi të përgatitur dhe elastikë ndaj kërcënimeve globale për shëndetin, është e domosdoshme të kemi bashkëpunim ndërkombëtar në këtë fushë,” tha zëdhënësja e Komisionit Evropian, Eva Hrncirova, në një konferencë për shtyp në Bruksel.
Ajo shtoi: “Shpresojmë që administrata amerikane të marrë në konsideratë implikimet e këtij vendimi përpara se të formalizojë tërheqjen.”
Në një lëvizje të ngjashme, Trump ishte tërhequr nga OBSH-ja në vitin 2020, por ky vendim u përmbys nga presidenti Joe Biden në 2021.
Shumë shkencëtarë dhe ekspertë kanë paralajmëruar se largimi nga OBSH mund të dëmtojë progresin e bërë ndër vite në luftën kundër sëmundjeve infektive si SIDA, malaria dhe tuberkulozi.
Ata gjithashtu paralajmërojnë se ky veprim mund të dobësojë aftësinë e botës për t’u mbrojtur nga shpërthimet e reja të sëmundjeve të rrezikshme që mund të shkaktojnë pandemi.
LEXO EDHE: Shpalli emergjencë kombëtare në kufi, Meksika reagon ndaj vendimeve të Trump!
“Pandemia e COVID-it është një shembull i qartë. Mësuam se viruset nuk ndalen në kufij dhe se bashkëpunimi global në shëndetësi është i domosdoshëm,” theksoi Hrncirova.
