Kalifornia ka pezulluar testimin e makinave pa shofer, Cruise, duke përmendur shqetësimet e sigurisë pas një sërë aksidentesh dhe fatkeqësish. Rregullatori i automjeteve deklaroi të martën se vendimi ka hyrë në fuqi menjëherë, duke përmendur ‘një rrezik të paarsyeshëm për sigurinë publike’.
Automjetet autonome të prodhuara nga General Motors janë pritur me reagime të ndryshme nga publiku, disa prej të cilëve i shohin ato si një zhvillim teknologjik emocionues, ndërsa të tjerët i shohin ato si një telash ose një rrezik.
Pezullimi pason një seri aksidentesh që përfshijnë automjete Cruise dhe shënon një pengesë serioze për përpjekjet e General Motors për të hyrë në industrinë e automjeteve autonome. Më 2 tetor, një grua në San Francisko u godit nga një makinë që e shtyu në rrugën e një Cruise.
Një zëdhënës i kompanisë shpjegoi në atë kohë se mjeti kishte “frenuar në mënyrë agresive për të minimizuar ndikimin”. Makina më pas qëndroi në vend mbi gruan, duke e lënë atë të mbërthyer nën automjet derisa të mbërritën mjekët.
Kompania njoftoi në një deklaratë se do të pezullonte operimin në San Francisko. Prodhuesit e automjeteve premtuan që makinat vetë-drejtuese të bëhen një pjesë e rëndësishme e së ardhmes së industrisë , por disa kanë luftuar për të kapërcyer shqetësimet nga publiku dhe agjencitë qeveritare.
General Motors më parë e quajti Cruise një “mundësi gjigante rritjeje”. Në qershor, CEO dyfishoi një parashikim se Cruise do të gjeneronte 50 miliardë dollarë të ardhura vjetore deri në vitin 2030. Por, kompania raportoi të martën se kishte humbur më shumë se 720 milionë dollarë vetëm në tremujorin e tretë të këtij viti.
