Të paktën pesë persona humbën jetën në Kroaci, Slloveni e Bosnjë dhe dhjetëra u plagosën pasi një stuhi e fuqishme me erëra të forta e shi të dendur goditi Ballkanin një ditë më parë. Po ashtu ka dëme të mëdha në rajonet e prekura. Pas disa ditësh shumë të nxehta e të thata, Ballkani përjetoi stuhinë e dytë brenda dy ditësh, teksa pjesë të tjera të Europës po luftojnë me temperatura të larta e zjarre.
Në kryeqytetin kroat, Zagreb dy burra të moshave 48 e 50-vjeç humbën jetën pasi u goditën nga rrëzimi i pemëve. Për fat të keq, nuk mundën t’iu mbijetonin lëndimeve të rënda në kokë. Po në Kroaci, në Cernik një person gjeti vdekjen, po nga rrëzimi një i peme.
Stuhia errësoi papritur qiellin dhe solli shi, përmbytje të shpejta e erëra në të gjithë Zagrebin duke filluar rreth orës 16:00 të një dite më parë. Transporti u ndal, pati ndërprerje të energjisë elektrike dhe rrugët u bllokuan për shkak të pemëve të rrëzuara.
Shërbimet e urgjencës së Zagrebit u kërkuan qytetarëve të tregonin durim, pasi u përballën me qindra thirrje për ndihmë.
Iu bëjmë thirrje qytetarëve të telefonojnë vetëm nëse janë në një situatë kërcënuese për jetën, deri në stabilizimin e situatës.
Një situatë e ngjashme u raportua në Slloveninë fqinje me Kroacinë, ku era e fortë rrëzoi pemë dhe dëmtoi çatitë. RTV Sllovenia raportoi se një person humbi jetën dhe një tjetër u plagos kur një pemë ra mbi ta në zonën e liqenit Bled.
Një person humbi jetën në Bosnje dhe të paktën 20 u plagosën. Autoritetet në Serbi lëshuan paralajmërime për qytetarët ndërsa stuhia u zhvendos drejt lindjes. Erërat e forta u përhapën në kryeqytetin serb Beogradit, dje në mbrëmje.
Disa pjesë të qytetit mbetën pa energji elektrike dhe aeroporti i Beogradit u mbyll përkohësisht. Në të tjera vende në Serbi, banorët raportuan pemë të çara në mes, tulla që binin e çati të dëmtuara. Një vajzë 12-vjeçare u shtrua në spital pasi i ra një pemë në qytetin verior të Novi Sadit. Alpinistëve iu kërkua të qëndrojnë larg zonave me pemë.
