Në malin e Shëngjinit vijon operacioni për shuarjen e një zjarri që ka nisur mbrëmjen e kaluar dhe ende mbetet aktiv. Në terren janë angazhuar zjarrfikës, punonjës të emergjencave civile, shërbimi pyjor si dhe forca të ushtrisë, të cilat po punojnë për izolimin e flakëve.
Autoritetet lokale dhe qendrore kanë bërë thirrje për kujdes të shtuar, duke paralajmëruar qytetarët që të shmangin djegien e mbeturinave dhe të sipërfaqeve bujqësore, pasi veprime të tilla mund të përshkallëzojnë situatën dhe të sjellin pasoja ligjore.
Sipas informacioneve të raportuara, policia ka shoqëruar një person të dyshuar si përgjegjës për zjarrin. Dyshohet se ai ka ndezur mbeturina pranë zonës malore, duke shkaktuar përhapjen e flakëve në terren.
Ndërkohë, situata mbetet nën monitorim dhe forcat në terren po punojnë për të parandaluar përhapjen e mëtejshme të zjarrit në zonat përreth.
