Airbus kërkoi një përditësim të softuerit të kontrollit në avionin A320, që mund të ketë pësuar dëmtime serioze për shkak të rrezatimit intensiv diellor. Në fakt, vendimi ndalon funksionimin e mbi 6 mijë aeroplanëve në të gjithë botën, pasi kompjuterët në bord janë thelbësorë për disa operacione kritike gjatë fluturimit.
Përveç përditësimit të softuerit, mund të jetë i nevojshëm një riorganizim i harduerit, i cili do të çonte në ndërprerje të mëdha të operacioneve. Mijëra fluturime janë anuluar dhe mijëra janë në rrezik.
Pse Airbus ka ulur në tokë mijëra avionë?
Një deklaratë zyrtare e Airbus-it thotë se analiza e një episodi të kohëve të fundit e që përfshinte një avion A320 zbuloi se rrezatimi intensiv diellor mund të dëmtojë të dhënat kritike për funksionimin e kontrolleve të fluturimit.
Ne kërkojmë ndjesë për shqetësimin e shkaktuar dhe do të punojmë ngushtë me operatorët, duke e mbajtur sigurinë si përparësinë tonë kryesore.
Sa avionë janë prekur?
Vlerësohet se afro 6 mijë avionë A320 janë prekur, gjysma e flotës globale të kompanisë europiane. Megjithatë, shumica do të jetë në gjendje të kthehet në fluturim pas një përditësimi të shpejtë të softuerit.
Kur rregullohet defekti i Airbus A320?
Përditësimi dhe kontrollet në Airbus A319, A320 dhe A321 nisin nesër e zgjasin nga 3 orë e deri në disa javë.
Kur dhe si ndodhi defekti i softuerit të Airbus-it?
Vendimi u mor pas aksidentit që ndodhi më 30 tetor e që përfshinte një avion A320 që fluturonte nga Meksika drejt Shteteve të Bashkuara të Amerikës. Ndërsa ishte në modalitetin e plotë të lundrimit, pra me autopilotin aktiv, avioni filloi të zbriste në mënyrë të pakontrollueshme për disa sekonda, para se të rifitonte lartësinë. 15 persona mbetën të plagosur muajin e kaluar.
