Shqipëria ka potencialin të rrisë me 0.7% rritjen ekonomike vjetore nëse kryen reforma kyçe institucionale. Publikimi më i fundit i Bankës Botërore thekson mundësitë e vendeve të Ballkanit Perëndimor për të përshpejtuar konvergjencën ekonomike me vendet europiane.
BB-ja vlerëson se fushat kryesore për kryerjen e reformave përfshijnë: Mbylljen e hendekut infrastrukturor; Nxitjen e kapitalit njerëzor; Përforcimin e institucioneve dhe Përmirësimin e lidhjes rajonale.
Sipas Bankës Botërore, “zgjerimi i Bashkimit Europian drejt Ballkanit Perëndimor po përjeton një dinamizëm të paprecedentë, i mbështetur nga nisja e një plani rritjeje të përshtatur prej 6 miliardë eurosh”. Ky moment i rinovuar ofron një mundësi të rëndësishme për Ballkanin Perëndimor, që të përshpejtojë konvergjencën ekonomike me standardet e jetesës së bashkëmoshatarëve të tyre europianë, që ka ngecur.
Duke u mbështetur në trajektoren e zhvillimit të Ballkanit Perëndimor e shteteve të reja anëtare të përzgjedhura gjatë viteve 1991-2023, si dhe simulimet që matin ndikimin në Produktin e Brendshëm Bruto (PBB) të reformave specifike të politikave, kjo notë politike paraqet një axhendë të re ekonomike për Ballkanin Perëndimor që do të zbatohet në sinergji me planin e rritjes, thekson Banka Botërore.
Po ashtu, institucioni financiar ndërkombëtar vëren se analiza tregon se nëse këto vende mund të arrijnë nivelet e Shteteve të Reja Anëtare në lidhje me fuqinë e institucioneve, nivelin e investimeve, vëllimin e tregtisë dhe cilësinë e arsimit, ritmi i rritjes së tyre mund të dyfishohet.
