Tri ditë nga nisja e regjistrimit të emigrantëve për zgjedhjet parlamentare të 2025 , Partia Demokratike ka nisur një auditim teknik të platformës online të KQZ, pasi ka konstatuar vështirësi në aplikim të votuesve nga jashtë.
“Është e vërtetë që ka vështirësi, një grup i yni po bën auditin e platformës dhe me shpejtësi do të na informojë se ku qëndrojnë problemet. Por përsëri, thirrja ime është mos e humbni durimin. Aplikoni 2, 3 herë deri sa të regjistroheni”, tha kreu i PD-së, Sali Berisha.
Sali Berisha paralajmëroi se auditi teknik i PD do dalë shumë shpejt më konkluzione se cilat defektet duhen korrigjuar. Porosia për të tijtë mbetet e njëjtë, të përveshin mëngët dhe të marrin rrugët përtej kufijve për votat e diasporës.
“Realisht ka një mënyrë për të bërë pluhur këtë shtet elektoral, kriminal dhe leva e Arkimedit për këtë është emigracioni dhe diaspora”, shtoi Berisha.
Nga hapja e platformës online janë shënuar rreth 10 mije aplikime. Interesi i lartë i diasporës ka rritur oreksin e politikës për votat e tyre.
“Kryetarët e bashkisë kanë marrë urdhër që të mbyllin bashkitë dhe të dalin në emigracion dhe diasporë. U bëj thirrje të gjithë emigrantëve, të gjithë diasporës të gjuajnë me vezë dhe domate të gjithë këta hajdutë”, përfundoi kreu i PD.
Sali Berisha sulmoi edhe drejtuesin politik të Partisë Socialiste për diasporën Tualant Balla, duke e etiketuar si kriminel elektoral.
