Gjykata Themelore në Prishtinë dënoi me 15 vjet burg Çedomir Aksiçin për krime lufte në komunën e Shtimes. Gjyqi ndaj tij u zhvillua në mungesë dhe është dënuar për krime që sipas aktakuzës u kryen në muajt janar-maj 1999, siç raporton Betimi për Drejtësi. Në nëntor 2023 nisi gjykimi dhe ky është rasti i parë i një gjykimi të tillë, pasi me Kodin e ri të Procedurës Penale të Republikës së Kosovës nuk lejohen proceset në mungesë.
Në seancën e parë, Prokuroria tha se shfrytëzoi të gjitha mundësitë ligjore që Arsiç të ishte i pranishëm në gjykatë, por nuk u arrit. Referuar aktakuzës që u ngrit majin e vitit të kaluar, Çedomir Aksiç, së bashku me pjesëtarë të tjerë të forcave serbe, pati urdhëruar dëbimin e banorëve të lagjes në pikën e quajtur “Kodra e Gështenjave”, mes fshatrave Mulapolc, Reçak e Petrovë, në komunën e Shtimes.
Në aktakuzë thuhet se më pas, dogjën shtëpitë e të dëmtuarave duke u shkaktuar dëme morale dhe materiale.
Në vendin e quajtur “Lugu i Neshës”, në Petrovë të Shtimes, Çedomir Aksiç ekzekutoi një person, familjen e të cilit e ndaloi paraprakisht. Po sipas aktakuzës, Aksiç ka marrë pjesë në vrasjen e Hajriz Brahimit, Hakin Muratit, Sabri Muratit, Arif Muratit, Ahmet Mustafës, Sadik Mujotës, Skënder Halitit e Hanumshahe Mujotës, në Reçak.
Aksiç u lind në Shtime, por adresa e tij aktuale është në Serbi. Sipas Kodit të Procedurës Penale, gjykimet në mungesë mbahen në rastet kur i akuzuari heq dorë vetë nga e drejta për të qenë i pranishëm në proceset gjyqësore.
Një gjykim i tillë mund të mbahet kur Prokuroria dhe Gjykata t’i kenë shteruar të gjitha mjetet për sigurimin e pranisë së të akuzuarit.
Sipas Kodit të Procedurës Penale, neni 303, gjyqtari ose kryetari i trupit gjykues mban seancë dëgjimore për të përcaktuar përse i akuzuari mungon dhe për të vlerësuar çdo sqarim apo dëshmi, nëse i akuzuari ka vendosur vullnetarisht të mungojë në gjykim. Në lidhje me marrjen e këtij vendimi, gjyqtari ose kryetari i trupit gjykues mban parasysh nëse janë bërë përpjekje të arsyeshme për ta gjetur të akuzuarin.
