Apeli vjen pikërisht nga ata që, të paktën në letër, do të kishin gjithçka për të humbur. Megjithatë, ata kanë zgjedhur t’i kërkojnë qeverisë britanike të rrisë taksat pikërisht për pasuritë më të mëdha. Mes firmëtarëve është Gary Lineker, ish-sulmuesi i kombëtares angleze dhe prej vitesh prezantues i emisionit të njohur sportiv “Match of the Day”, së bashku me më shumë se 100 milionerë që jetojnë në Mbretërinë e Bashkuar, mes tyre edhe muzikanti Brian Eno. Mesazhi drejtuar kryeministrit të ri, Andy Burnham, është i qartë: “Na taksoni më shumë.”
Letra, e promovuar nga organizata Patriotic Millionaires, është nënshkruar nga 120 persona të pasur të vendit, përfshirë sipërmarrës, shkrimtarë, ekonomistë dhe figura të njohura të botës së artit dhe spektaklit.
“Jemi krenarë që paguajmë taksa dhe që zgjedhim të jetojmë këtu”, thuhet në dokument. “Nuk kërkojmë rritje taksash për ata që zgjohen çdo mëngjes për të punuar dhe për të siguruar jetesën, por për ata që i sigurojnë të ardhurat nga pasuria që zotërojnë.”
Përveç Lineker, mes firmëtarëve janë edhe Ian Gregg, ish-kryetar i zinxhirit ushqimor Greggs, regjisori Richard Curtis, autor i filmave Love Actually dhe Notting Hill, shkrimtarja Val McDermid, ish-tregtari i City-t londinez Gary Stevenson dhe eksperti i klimës Michael Berners-Lee.
“Vendi ynë i mrekullueshëm meriton mbështetjen e secilit prej nesh”, deklaroi Lineker. “Jam krenar që qëndroj krah njerëzve në të gjithë Mbretërinë e Bashkuar që dëshirojnë të jetojnë në një shoqëri më të drejtë.”
Sipas ish-futbollistit, kontributi përmes taksave është pjesë e identitetit britanik, por sot barra fiskale bie kryesisht mbi qytetarët e zakonshëm.
“Më të pasurit mund të bëjnë më shumë dhe shumica e tyre e dëshiron këtë”, tha ai.
Propozimi i mbështetur nga Patriotic Millionaires parashikon disa forma të mundshme të taksimit të pasurisë. Një prej tyre është vendosja e një takse prej 2% për pasuritë që kalojnë 10 milionë paund, e cila, sipas grupit, do t’i sillte arkës së shtetit rreth 24 miliardë paund në vit.
Kjo masë do të prekte një numër shumë të kufizuar njerëzish: më pak se 0,04% të popullsisë britanike, rreth 20 mijë persona, sipas organizatës Tax Justice UK. Një analizë e mëparshme kishte vlerësuar gjithashtu se një taksë mbi 350 familjet më të pasura të vendit, përfshirë 156 miliarderë, mund të siguronte deri në 15 miliardë paund në vit.
Sipas mbështetësve të kësaj nisme, këto të ardhura do të mund të financonin një pjesë të konsiderueshme të shërbimeve publike. Vlerësimet e cituara nga organizatorët tregojnë se një taksë mbi pasurinë mund të mbulonte më shumë se një të tretën e buxhetit vjetor të shkollave në Angli, të financonte zgjerimin e vakteve falas për të gjithë nxënësit dhe të ndihmonte në heqjen e kufizimeve për subvencionet e strehimit. Gjithashtu, ajo mund të kontribuonte në mbulimin e mungesës së fondeve për shpenzimet në mbrojtje.
Andy Burnham, përpara se të hynte në Downing Street, nuk e kishte përjashtuar mundësinë e vendosjes së një takse mbi pasurinë gjatë një interviste pikërisht me Gary Lineker. Megjithatë, ai kishte theksuar se nuk dëshironte të nxiste ndarje shoqërore apo të perceptohej si një lider që synon të godasë një grup të caktuar.
Debati mbetet i hapur edhe brenda Partisë Laburiste. Wes Streeting, aktualisht ministër i Mbrojtjes, kishte deklaruar më parë se barazimi i taksës mbi fitimet kapitale me atë mbi të ardhurat mund të përbënte një “taksë efektive mbi pasurinë”. Ndërsa Jonathan Reynolds, ministër i Tregtisë, e kishte kundërshtuar idenë duke e quajtur “absurde”, me argumentin se qeveria tashmë e kishte rritur kontributin e më të pasurve përmes masave të tjera, si taksat mbi avionët privatë dhe ndryshimet në taksën e trashëgimisë.
Kundërshtarët e taksës mbi pasurinë argumentojnë se një masë e tillë mund t’i shtyjë personat me pasuri të mëdha të largohen nga Mbretëria e Bashkuar. Por mbështetësit e reformës sjellin të dhëna të tjera: një sondazh i porositur nga Patriotic Millionaires dhe i realizuar nga Survation tregon se 75% e milionerëve do të ishin të gatshëm të paguanin më shumë taksa për të mbrojtur sistemin social, ekonomik dhe kulturor të vendit./ Corriere della Sera
