Sulmuesi i ri i Angers, Chérif, po kthehet në një nga emrat më të përfolur të futbollit francez dhe europian. Vetëm 19 vjeç, i lindur në dhjetor 2006 në Guine dhe i rritur në Francë, ai ka shpërthyer këtë sezon në Ligue 1 me paraqitje vendimtare dhe gola spektakolarë. Fizikisht i fortë, 1.88 m i gjatë dhe 77 kg, Chérif është një qendërsulmues modern që godet me të dyja këmbët, mbron mirë topin dhe është shumë i rrezikshëm në kundërsulm.
Ai ka shënuar katër gola në kampionat, përfshirë një aksion individual mbresëlënës kundër Marsejës, ndeshje ku realizoi dopietë dhe tërhoqi vëmendjen e gjithë Francës së futbollit. Goli i tij i tretë radhazi dhe më pas i katërti pak para Krishtlindjeve konfirmuan se nuk bëhet fjalë për rastësi. Janë gola me personalitet, forcë dhe inteligjencë taktike.
Vlera e tij në treg ka shpërthyer: Angers kërkon jo më pak se 25-30 milionë euro, me synimin për të thyer rekordin e shitjes së klubit. Trajneri Alexandre Dujeux ka lënë të kuptohet se një transferim është i mundshëm, duke pranuar realitetin ekonomik të klubit.
Interesi është i madh: Milan, Villarreal, Crystal Palace, Eintracht Frankfurt, Stuttgart dhe disa klube të tjera europiane po e ndjekin nga afër. Vendimi pritet në janar ose verë, por një gjë është e sigurt: emri i Chérif do të dëgjohet gjithnjë e më shpesh.
