Një studim i publikuar në revistën “General Psychiatry” sugjeron se disa lloje bakteresh të pranishme në zorrë mund të rrisin rrezikun e pagjumësisë, duke shtuar një dimension të ri në kërkimet mbi lidhjen mes shëndetit të zorrëve dhe gjumit.
Sipas të dhënave, rreth 10% e të rriturve vuajnë nga pagjumësia e rregullt, ndërsa 20% të tjerë përjetojnë simptoma të rastësishme, si vështirësi për të fjetur, cilësi të dobët gjumi dhe lodhje gjatë ditës. Studiuesit analizuan të dhënat gjenetike të afro 387 mijë pacientëve me pagjumësi dhe mikrobiomën e zorrëve të 27 mijë personave.
Rezultatet treguan një lidhje të ndërsjellë mes pagjumësisë dhe përbërjes së baktereve në zorrë. Disa grupe bakteresh rritën rrezikun e pagjumësisë me 1 deri në 4%, ndërsa të tjera e ulën atë me 1 deri në 3%.
Po ashtu, personat me pagjumësi kishin nivele më të ulëta të disa baktereve dhe më të larta të disa të tjerave.
Mikrobioma e zorrëve – e përbërë nga baktere, kërpudha dhe viruse – luan rol kyç në tretje, rregullimin e sistemit imunitar dhe prodhimin e neurotransmetuesve si serotonina dhe dopamina, të cilët ndikojnë në ciklin e gjumit.
Studiuesit theksojnë se lidhja mes shëndetit të zorrëve dhe gjumit mund të lidhet me rregullimin imunitar, inflamacionin dhe procese të tjera qelizore.
Megjithëse studimi ka kufizime – si përbërja etnike e pjesëmarrësve dhe mungesa e të dhënave mbi dietën – autorët besojnë se këto gjetje mund të hapin rrugën për trajtime të reja ndaj pagjumësisë, përmes probiotikëve, prebiotikëve apo edhe transplantimit të fekaleve.
