Administrata e Donald Trump po përgatit një paketë masash ekzekutive për të rritur furnizimin me energji elektrike në Shtetet e Bashkuara, me qëllim mbështetjen e zhvillimit të teknologjisë së Inteligjencës Artificiale (IA). Kërkesa për energji nga qendrat e të dhënave të IA-së pritet të rritet shumë, duke vënë presion mbi rrjetet ekzistuese të energjisë. Ndër masat e propozuara janë lehtësimi i lidhjes së projekteve të reja energjetike me rrjetin elektrik dhe sigurimi i tokës federale për ndërtimin e këtyre qendrave të të dhënave.
Gjithashtu po shqyrtohet thjeshtimi i lejeve për ndërtimin e qendrave të të dhënave me një leje kombëtare nën Aktin për Ujin e Pastër. Në janar, Trump zhvilloi një takim me drejtues të kompanive teknologjike për të promovuar Projektin Stargate, i cili synon ndërtimin e qendrave të të dhënave dhe krijimin e më shumë se 100,000 vendeve të punës.
Administrata synon të përgatisë një Plan Veprimi për IA-në deri më 23 korrik dhe po planifikon të shpallë atë datë si “Dita e Veprimit për IA”. Rritja e kërkesës për energji pritet të jetë pesë herë më e madhe se parashikimet e mëparshme deri në vitin 2029. Pas vetëm 18 muajsh që nga debutimi, ChatGPT ka nisur të ndikojë dhe modifikojë mënyrat e shprehjes njerëzore. Sipas një analize të kryer nga Max Planck Institute mbi më shumë se 280 mijë video të publikuara në kanalet YouTube Akademike, është zbuluar se inteligjenca artificiale (IA) mund të ketë një ndikim të pavullnetshëm mbi mënyrat e të shprehurit dhe përdorimin e disa fjalëve të caktuara, të cilat përdoren gjithnjë e më shumë.
Sipas analizës, disa nga këto fjalë kanë pësuar një rritje prej më shumë se 50% në komunikimin njerëzor dhe përkojnë me fjalë kyçe që përdoren shpesh nga ChatGPT. Për më tepër, një studim i hollësishëm i realizuar nga Universiteti i Stanfordit vë në dukje se fjalori i njerëzve po ndryshon dhe se ka një tendencë për të përthithur dhe riprodhuar gjuhësinë virtuale në komunikimin e përditshëm.
