Një histori mbijetese që ka prekur mbarë Venezuelën vjen nga qyteti bregdetar Caraballeda, ku 12-vjeçarja Fabiana u nxor e gjallë pas 32 orësh nën rrënojat e pallatit të saj, i cili u shemb nga tërmeti me magnitudë 7.5 që goditi vendin më 24 qershor.
Në momentin kur lëkundjet nisën, nëna e saj, Karina Blanco, po zhvillonte një orë spinningu. Sapo kuptoi forcën e tërmetit, ajo hipi në makinë dhe u nis me shpejtësi drejt shtëpisë, e pushtuar nga frika për vajzën e saj të vetme.
“Kur mbërrita, nuk mund ta besoja atë që pashë. Pashë një pallat, pastaj një boshllëk aty ku kishte qenë pallati ynë dhe më pas një tjetër pallat. Mendova se vajza ime kishte humbur jetën”, rrëfen Karina.
Në atë moment, Fabiana ndodhej vetëm në apartament. Ajo tentoi të strehohej në kuzhinë, por muret e banesës u shembën dhe e hodhën në tokë.
“Pashë gjithçka që dridhej dhe binte. Kur muret u çanë mendova se do të vdisja. I thashë vetes se askush nuk do të vinte të më shpëtonte”, kujton 12-vjeçarja.
E bllokuar mes betonit, me tavanin vetëm pak centimetra larg fytyrës, Fabiana qëndroi e qetë, megjithëse vuan nga ankthi dhe klaustrofobia.
Pas disa orësh, një infermiere e bllokuar në të njëjtin pallat dëgjoi zërin e saj dhe i kërkoi të mos humbiste shpresën. Infermierja u shpëtua rreth gjashtë orë më vonë dhe njoftoi ekipet e kërkim-shpëtimit se një vajzë e quajtur Fabiana ishte ende gjallë.
Nëna e saj, e cila deri atë moment ishte pajtuar me idenë se e kishte humbur, riktheu shpresën.
“Në atë çast më thanë: ‘Vajza jote është gjallë’. Ishte momenti më i madh i jetës sime”, thotë Karina.
Nën rrënoja, Fabiana gjeti telefonin e saj, por nuk kishte sinjal. Ajo regjistroi një video ku kërkonte ndihmë, duke treguar se ishte e bllokuar dhe se shumë fqinjë ndodheshin në të njëjtën situatë.
Gjatë orëve të gjata nën rrënoja, Fabiana arriti të lëvizte disa copa betoni për të çliruar njërën këmbë, e cila i ishte bllokuar në një pozicion të dhimbshëm. Ndërsa përpiqej të krijonte pak hapësirë, ajo gjeti rastësisht një shishe me ketchup dhe pak djathë të grirë, të cilat i konsumoi për të mbajtur energjitë. “Ato më ndihmuan të qëndroja e vetëdijshme”, tregoi 12-vjeçarja.
Shpresa u rikthye kur një vullnetar i quajtur Viktor dëgjoi zërin e saj mes rrënojave. Ai njoftoi menjëherë familjen dhe ekipet e shpëtimit. Pas disa përpjekjesh të pasuksesshme, një ekip zjarrfikësish nga Karakasi arriti të hapte një tunel drejt vendit ku ndodhej vajza.
Pas 32 orësh, Fabiana u nxor e gjallë nga rrënojat dhe u përqafua me nënën e saj në një skenë që u bë virale në rrjetet sociale.
“Kur dola dhe pashë familjen time e gjithë ndërtesën të shembur, më dukej sikur nuk ishte reale, sikur po shikoja një serial televiziv”, rrëfen ajo.
Nga afro 50 banorë që jetonin në pallatin ku banonte familja, vetëm tre persona u shpëtuan të gjallë.
Bilanci i tërmeteve në Venezuelë vijon të rëndohet. Sipas autoriteteve, deri tani janë konfirmuar 3.342 viktima, ndërsa dhjetëra mijëra persona rezultojnë ende të zhdukur.
Fabiana ka pësuar vetëm një frakturë në këmbën e majtë dhe disa plagë të lehta. Ajo po qëndron aktualisht në shtëpinë e gjyshes së saj, ndërsa familja përpiqet të rikuperohet nga tragjedia.
“Do të na duhet kohë të shërohemi. Kam humbur fqinjë dhe miq. Por gjëja më e rëndësishme është që vajza ime është gjallë”, përfundon Karina.
