Sezoni i tretë i serialit të famshëm “Squid Game” ka rikthyer ethet dhe emocionet tek publiku global, me një finale të errët dhe plot tension. Por përtej lojërave mizore dhe kthesave dramatike, një tjetër element ka ngjallur debat të madh në rrjet: foshnja misterioze që shfaqet në disa nga episodet më intensive.
Shikuesit kanë përshkruar praninë e saj si “shqetësuese”, “e pazakontë” dhe “jo njerëzore”, ndjesi që kanë rezultuar të justifikuara – pasi nuk bëhet fjalë për një foshnjë të vërtetë.
E vërteta? Ky personazh i vogël është një robot hiper-realistik i krijuar enkas për serialin. Me dimensione, mimikë dhe lëvizje thuajse identike me një fëmijë të gjallë, roboti është përmirësuar edhe më tej përmes efekteve CGI, duke krijuar një iluzion thuajse të përsosur në ekran.
Pse nuk u përdor një foshnjë reale? Sipas producentëve, arsyeja lidhet me kufizimet ligjore në Korenë e Jugut, lodhjen që shkaktojnë oraret e gjata të xhirimeve dhe përmbajtjen emocionalisht të rëndë të disa skenave.
Për të ruajtur koherencën vizuale dhe për të shmangur çdo rrezik etik, ekipi zgjodhi një zgjidhje teknologjike që rezultoi më tronditëse se vetë realiteti.
Ky nuk është i vetmi “personazh i rremë” në sezonin e tretë. Një tjetër krijesë – një qen që duket i gjallë – është gjithashtu produkt i robotikës dhe teknologjisë së avancuar CGI.
“Squid Game” dëshmon sërish se është më shumë se një serial. Është një eksperiment vizual dhe emocional që sfidon perceptimin e realitetit dhe shpalos fuqinë e teknologjisë në tregimtarinë moderne.
