Ferrari po përgatit gjeneratën e re të supermakinës së tij hibride, pas pesë vjetësh që nga prezantimi i SF90 Stradale, makinë që debutoi në fund të vitit 2019.
Sipas raporteve të fundit, prodhuesi italian ka filluar të zbulojë versionin e ri përmes aplikacionit MyFerrari, ku një video e shkurtër tregon ndryshime të dukshme në dizajn, veçanërisht në pjesën e dritave të pasme.
Në pamjet e publikuara shihet një transformim i dritave të pasme, të cilat nga dy drita të ndara në SF90 aktuale do të kthehen në një shirit të vazhdueshëm, në stilin e modeleve si Ferrari Amalfi dhe F80. Ndryshime të mëdha priten edhe në pjesën e përparme të makinës, ku një prototip i ri i koduar F173M është parë në Gjermani, duke treguar vrima të mëdha për ajrosje dhe drita përparme me orientim vertikal.
Edhe pse motori V8 me 4.0 litra turbo me tre motorë elektrikë do të ruhet, është shumë e mundur që fuqia maksimale do të rritet mbi 1,000 kuaj fuqi, për t’u përballur me rivalët si Lamborghini Revuelto PHEV që ka 1,001 kuaj fuqi.
Ferrari pritet të zbulojë më shumë detaje gjatë prezantimit zyrtar në Milano më 9 shtator, ku do të bëhet e qartë se çfarë ndryshimesh dhe përmirësimesh teknologjike do të sjellë kjo supermakinë e re hibride.
