Muzika elektronike është njohur zyrtarisht nga shteti francez si pjesë e Trashëgimisë Kulturore Jomateriale, një hap historik që konfirmon rolin e saj në formësimin e identitetit artistik dhe kulturor të Francës. Vendimi e fut këtë zhanër në inventarin kombëtar të trashëgimisë jomateriale, duke e vendosur krah formave të tjera të shprehjes kulturore që kanë ndikuar thellësisht shoqërinë franceze.
Ministrja franceze e Kulturës, Rachida Dati, theksoi se muzika elektronike “ka vendin e saj të merituar në trashëgiminë tonë jomateriale kombëtare”, ndërsa nënvizoi edhe rëndësinë e klubeve të natës, të cilat tashmë konsiderohen si “hapësira të shprehjes artistike dhe festimit”. Me këtë njohje, emra të mëdhenj si Air, Cassius, Daft Punk, Justice dhe legjenda Jean-Michel Jarre konsiderohen tashmë shtylla të kulturës franceze.
Veçanërisht, vëmendje e posaçme i kushtohet Jarre, i cili në fund të viteve ’70 revolucionarizoi muzikën elektronike me albumin “Oxygène”. I realizuar tërësisht me sintetizatorë të hershëm dhe pa vokale, albumi u bë një pikë referimi globale dhe hapi rrugën për atë që më vonë u quajt “French Touch”. I publikuar në vitin 1976, “Oxygène”, së bashku me albumet pasuese si “Équinoxe” dhe “Zoolook”, ndikoi jo vetëm në skenën franceze, por edhe në zhvillimin e muzikës elektronike në mbarë botën.
Ky trashëgim vazhdon të frymëzojë breza të rinj artistësh dhe producentësh. Angazhimi i Jean-Michel Jarre për muzikën dhe kulturën shkon përtej krijimtarisë artistike. Ai ka qenë president i CISAC, konfederata botërore e shoqatave të autorëve dhe që nga viti 1993 mban rolin e Ambasadorit të UNESCO-s, ku ka qenë një zë i fortë në mbrojtje të trashëgimisë jomateriale dhe të muzikës elektronike si formë arti.
