Gara për të lançuar në treg makinën e parë fluturuese në botë ka filluar, me Klein Vision që ka publikuar pamje të reja të AirCar-it, i cili del në shitje në vitin 2026 për 800,000 dollarë. Zhvilluesi me bazë në Sllovaki është i pari që është certifikuar për fluturim dhe shpreson të jetë në shitje në janar të vitit të ardhshëm. AirCar ka përfunduar tashmë 170 orë fluturimi të suksesshme, si dhe mbi 500 ngritje dhe ulje, ka një rreze fluturimi prej 620 miljesh dhe një shpejtësi fluturimi prej 250 km/orë.
Kompania sllovake, Klein Vision ka arritur një hap të rëndësishëm në inovacionin e transportit, duke certifikuar modelin e saj të avancuar të makinës fluturuese, AirCar 2. Ky automjet futurist ka aftësinë të shndërrohet nga makinë në aeroplan për vetëm 90 sekonda, duke kombinuar komoditetin e lëvizjes tokësore me fleksibilitetin e fluturimit ajror.
AirCar 2 është rezultat i viteve të kërkimit dhe zhvillimit dhe tashmë ka përfunduar me sukses mbi 200 fluturime testuese, duke dëshmuar sigurinë dhe funksionalitetin e tij në kushte reale. Këto teste kanë qenë të domosdoshme për të përmbushur standardet ndërkombëtare të sigurisë dhe për të siguruar certifikimin nga autoritetet kompetente.
Modeli i ri ka një rreze fluturimi deri në 1000 kilometra, çka e bën të përshtatshëm për udhëtime ndërqytetëse apo ndërkombëtare pa pasur nevojë për ndalesa të shpeshta. Me një shpejtësi maksimale prej 250 km/h, AirCar 2 ofron një alternativë të shpejtë dhe të efektshme ndaj trafikut të rënduar në rrugët tokësore.
