Liqeni Kariba është liqeni më i madh artificial në botë dhe shtrihet përgjatë kufirit mes Zimbabwes dhe Zambisë. I krijuar si pjesë e një projekti hidroenergjetik, sot ai është shndërruar në një nga destinacionet më të veçanta të Afrikës, i njohur për peizazhet dramatike ku pemët gjysmë të zhytura në ujë krijojnë një atmosferë pothuajse surrealiste, sidomos gjatë perëndimeve të diellit.
Zona përreth liqenit ka një histori komplekse dhe të debatueshme, por sot është një hapësirë e rëndësishme për turizmin e natyrës dhe safari-luksit. Megjithëse territori është shumë i madh, akomodimi mbetet ende i kufizuar, duke e bërë përvojën më ekskluzive. Përveç anijeve-hotel të cilat janë mjaft të popullarizuara, ekzistojnë edhe disa lodgje luksoze përgjatë brigjeve.
Një nga ndalesat më të njohura në zonë është Bumi Hills Safari Lodge, i rinovuar që ofron pamje të hapura mbi liqen dhe një atmosferë që kombinon natyrën e egër me ndjesinë e një resorti tropikal. Këtu, përvoja nuk kufizohet vetëm në safari klasik tokësor. Aktivitetet në ujë, si peshkimi dhe lundrimet panoramike, janë pjesë thelbësore e qëndrimit. Shpesh vizitorët mund të shohin elefantë në brigje dhe krokodilë që lëvizin në ujë, duke krijuar një ekuilibër të veçantë mes qetësisë dhe natyrës së egër.
Bumi Hills është veçanërisht i njohur për pishinën me pamje panoramike dhe për perëndimet e diellit që shihen mbi liqen. Një tjetër destinacion i rëndësishëm është Changa Safari, i vendosur brenda një koncesioni privat në Matusadona . Ky kamp ofron një përvojë më intime me natyrën, ku tingujt e ujit dhe prania e kafshëve të egra krijojnë një ndjesi të vazhdueshme afërsie me mjedisin.
Tendat janë të mëdha dhe të pajisura me komoditete të plota, ndërsa aktivitetet përfshijnë safari me varka, peshkim dhe ekskursione në zonat përreth. Një nga përvojat më të veçanta është lundrimi në perëndim të diellit drejt Sanyati Gorge, ku peizazhi i pemëve gjysmë të zhytura dhe kodrave të pyllëzuara krijon një panoramë mbresëlënëse. Për vizitorët më aventurierë, ecjet e organizuara që ofrojnë takime të afërta me elefantë dhe herë pas here edhe luanë.
