Ish-bashkëshorti i Amy Winehouse, Blake Fielder-Civil, ka folur hapur për rolin e tij në jetën dhe fundin tragjik të këngëtares, duke pranuar se ka pasur pjesën e tij të përgjegjësisë.
Në një intervistë në podkastin “Nevojitet të flasim”, ai u shpreh se e di që shumë njerëz e fajësojnë për vdekjen e saj në vitin 2011, kur artistja ndërroi jetë në moshën 27-vjeçare si pasojë e konsumit të tepërt të alkoolit.
E di që shumë veta besojnë se vdekja e saj është përgjegjësia ime. Nuk i shmangem përgjegjësisë për atë që kam bërë
-tha ai.
Megjithatë, ai theksoi se nuk duhet të mbajë të gjithë fajin, duke shtuar se Amy ishte një person me vullnet të fortë dhe merrte vetë vendimet e saj.
Ajo bënte atë që donte të bënte
-u shpreh ai, duke nënvizuar se marrëdhënia e tyre ishte komplekse dhe shpesh e trazuar.
Historia e tyre e dashurisë ka qenë shumë e komentuar ndër vite, me ndarje dhe ribashkime të vazhdueshme.
Ata u martuan në vitin 2007, por martesa u shoqërua me probleme serioze, përfshirë varësinë nga substancat dhe skandalet publike, derisa përfundimisht u ndanë në vitin 2009.
Sot, Blake Fielder-Civil thotë se është përballur me të kaluarën e tij, por këmbëngul se është e padrejtë që të konsiderohet i vetmi përgjegjës për fatin tragjik të këngëtares legjendare.
