Pas viteve larg skenës dhe një pritjeje që dukej e pafund për miliona fansa, BTS ka zbuluar më në fund planet që po qarkullonin si thashetheme në rrjet: grupi legjendar i K-pop-it do të rikthehet me një turne gjigant botëror në vitet 2026–2027, duke shënuar koncertet e para madhore që nga “Permission to Dance on Stage” në 2021–2022.
Burime pranë industrisë muzikore bëjnë të ditur se starti i këtij rikthimi do të ndodhë në Korenë e Jugut në prill 2026, ndërsa axhenda përfshin më shumë se 70 koncerte në disa kontinente, nga Azia dhe Amerika e Veriut, deri në Amerikën e Jugut, Australi dhe Europë.
Një itinerar masiv që pritet të kthejë BTS sërish në qendër të vëmendjes globale.
Shitja e biletave ka nisur të ngjallë ethe mes fansave. Para hapjes zyrtare për publikun më 24 janar, do të zhvillohen dy raunde shitjesh paraprake më 22 dhe 23 janar, ekskluzivisht për anëtarët e klubit të fansave të regjistruar në platformën Weverse, e administruar nga Hybe.
Ky sistem pritet të favorizojë fansat më besnikë, në një garë që parashikohet të jetë ndër më të ashpra të viteve të fundit.
Pauza e gjatë e grupit lidhej me shërbimin ushtarak të detyrueshëm në Korenë e Jugut, një proces që të gjithë anëtarët e BTS duhej ta përmbushnin.
Suga ishte i vetmi që e kreu shërbimin si punonjës i shërbimeve sociale, për shkak të një dëmtimi në shpatull, duke e përfunduar atë në qershor 2025, ndërsa gjashtë anëtarët e tjerë shërbyen në ushtri sipas rregullave standarde.
Rikthimi i BTS po konsiderohet që tani si një nga ngjarjet muzikore më të mëdha globale të dekadës, një moment historik që pritet të mbledhë miliona fansa dhe të rikthejë energjinë unike të grupit në skenat më të mëdha të botës.
Për shumëkënd, kjo nuk është thjesht një turne, por fundi i një pritjeje dhe fillimi i një epoke të re.
