Në Itali, një i moshuar ishte në karrocën e tij elektrike me rrota kur u godit dhe vdiq nga një makinë që drejtohej nga portieri i dytë i Interit, Josep Martinez. Aksidenti ndodhi në Fenegrò (Como), pranë Appiano Gentile, aty ku gjendet qendra stërvitore e Nerazzurrëve. Viktima, një burrë 81-vjeçar, po lëvizte përgjatë Rrugës Provinciale 32 kur automjeti e goditi, duke e lënë të vdekur menjëherë.
Futbollisti doli me shpejtësi nga makina për të ofruar ndihmë dhe raportohet se autoambulancat shkuan brenda pak minutash në vendngjarje, por për fat të keq nuk mund të bënin asgjë. Karabinierët po përpiqen të rindërtojnë skenën e aksidentit.
Sipas dëshmive të mbledhura nga hetuesit, 81-vjeçari devijoi dhe kaloi në korsinë përballë, pikërisht kur makina e Martinezit po afrohej, duke çuar në vdekjen tragjike. Në shenjë respekti, Interi anuloi konferencën për shtyp të trajnerit Cristian Chivu, në prag të ndeshjes kundër Fiorentinës.
Kush është Josep Martinez, portieri i përfshirë në aksident?
Shtetas spanjoll i moshës 27 vjeç, Martinez ka luajtur për Interin që nga sezoni i kaluar, pasi kaloi nga Genoa. Zëvendësuesi i Yann Sommer, ai debutoi për Nerazzurrët më 19 dhjetor, në ndeshjen e raundit të të 16-tave të Kupës së Italisë kundër Udineses, një fitore 2-0. Më 22 shkurt 2025, ai debutoi në ligë në një fitore 1-0 në shtëpi kundër ish-skuadrës së tij, Genoa, duke kontribuar në fitoren e Interit me një performancë të fortë. Ai përfundoi i treti me Spanjën në Kampionatin Europian U-21 2021.
