Ardijan Nuhiju nuk është më trajneri i Tiranës pasi është shkarkuar nga drejtimi i bardhebluve si pasojë e rezultateve të dobëta.
Vendimi i klubit bardheblu qarkullonte që prej kohësh por tashmë duket se është përfundimtar, të paktën sipas burimeve të emisionit “Kampionët” në “Kanal 10” në Kosovë. Në mediat kosovare është bërë e ditur se aventura e klubit të tij te kryeqytetasit është e mbyllur.
Nuhiju drejtoi Tiranën në një seri ndeshjesh të suksesshme që e bënë të dilte përkohësisht nga zona e rënies direkte nga kategoria, por u kthye përsëri aty me disfatën në derbi e më pas me atë përballë Teutës.
LEXO EDHE: Tirana merr goditjen e radhës, bardheblutë munden me një gol në fund nga Teuta!
Nuk është mister që Tirana është prej kohësh në bisedime me Orges Shehin dhe pret kthimin e tij në pankinën e bardhebluve, sapo palët do të gjejnë gjuhën e përbashkët si në aspektin ekonomik, ashtu edhe në atë sportiv, pasi trajneri kërkon garanci për projektin për të ardhmen. Ndaj edhe zyrtarizimi i largimit të Nuhijut mbetet varur në pritje të akordit mes palëve.
