Organizata Prix Versailles ka publikuar listën e dyqaneve më të bukura në botë për vitin 2026, duke vlerësuar hapësirat tregtare që dallohen për arkitekturën, dizajnin, inovacionin dhe lidhjen e tyre me kulturën lokale. Fituesit u shpallën më 29 qershor, ndërsa në fund të vitit tre prej tyre do të marrin çmime të veçanta për dizajnin më të mirë të brendshëm, të jashtëm dhe çmimin kryesor.
Në listën e këtij viti janë përfshirë disa nga butikët më prestigjiozë të markave të luksit, si House of Dior në Pekin, Tiffany & Co. Ginza në Tokio, Louis Vuitton Rodeo Drive në Beverly Hills dhe Hermès Rive Gauche në Paris.
Sipas jurisë, këto hapësira nuk janë thjesht dyqane, por destinacione ku ndërthuren arti, arkitektura dhe identiteti i markës. Çdo projekt është vlerësuar për mënyrën se si pasqyron trashëgiminë kulturore, përdor zgjidhje të qëndrueshme dhe krijon një përvojë unike për vizitorët.
Çmimet Prix Versailles, të organizuara çdo vit në bashkëpunim me UNESCO, konsiderohen ndër vlerësimet më prestigjioze në fushën e arkitekturës dhe dizajnit bashkëkohor. Ato përfshijnë kategori të ndryshme, si hotele, restorante, aeroporte, muze dhe hapësira tregtare, duke promovuar projektet që kombinojnë estetikën, funksionalitetin dhe inovacionin.
