Në një kohë kur rrjetet sociale janë të mbushura me imazhe të udhëtimeve ekzotike, resorteve me pesë yje dhe aventurave ekstreme, një prirje e re po fiton terren: “slow leisure”, ose arti i të pushuarit me ritëm të ngadaltë. Dhe sipas studimeve, kjo mënyrë e thjeshtë dhe minimaliste e të pushuarit ka ndikim më të madh në shëndetin mendor dhe emocional sesa udhëtimet luksoze.
Koncepti i “slow leisure” nuk ka të bëjë me buxhetin apo destinacionin, por me qëllimin e pushimit. Bëhet fjalë për kohë të dedikuar për aktivitete të thjeshta, të këndshme dhe shpeshherë shtëpiake, që nuk kanë për qëllim produktivitetin apo performancën, por qetësimin e mendjes dhe lidhjen me të tashmen.
Studime të kryera në University of Sussex tregojnë se:
Aktivitetet si leximi i një libri në diell, përgatitja e një çaji në qetësi, vizatimi, shëtitjet pa qëllim të qartë apo dëgjimi i muzikës pa ndërprerje, aktivizojnë pjesë të trurit të lidhura me rigjenerimin dhe reduktimin e kortizolit (hormoni i stresit).
Ndryshe nga pushimet e planifikuara deri në detaje, që shpesh na stresojnë më shumë sesa na qetësojnë, “pushimi i ngadaltë” lejon që trupi dhe mendja të rikthehen natyrshëm në një ritëm të ekuilibruar.
Psikologët theksojnë gjithashtu se:
Pushimi pasiv, i kombinuar me vetë-reflektim, rikthen kapacitetin tonë për kreativitet dhe vendimmarrje, që shpesh dëmtohet nga ritmi i përshpejtuar i jetës moderne.
Në vend që të ndiheni fajtorë për një fundjavë pa plane madhështore, provoni të krijoni një “ditë pushimi pa orar”: pa email, pa nxitim, pa pritshmëri. Ndonjëherë, çelësi i mirëqenies që kërkoni në një avion 10-orësh ndodhet në një mëngjes të ngadaltë në ballkonin tuaj.
