Manipulimi në marrëdhënie shpesh nis në mënyrë të padukshme – nga harrimi i një takimi deri te mohimi i ngjarjeve që kanë ndodhur vërtet.
Me kalimin e kohës, këto sjellje krijojnë pasiguri dhe i bëjnë viktimat të dyshojnë tek vetja. Ekspertët paralajmërojnë se bëhet fjalë për një formë abuzimi emocional që synon kontrollin dhe izolimin e partnerit.
Psikoterapistja Stephanie Moulton Sarkis, në një prononcim për “YourTango”, shpjegon se manipuluesit shpesh e bëjnë viktimën të mendojë se po humbet mendjen, në mënyrë që ajo të mbështetet vetëm tek versioni i tyre i realitetit.
Ndërsa psikoterapistja Rachel Wright thekson se ky proces zhvillohet gradualisht, gjë që e bën të vështirë për t’u dalluar në kohë.
Ekspertet veçojnë disa shenja paralajmëruese të manipulimit në çift:
Gënjeshtra të vazhdueshme
Manipuluesit gënjejnë edhe kur nuk kanë arsye, duke mohuar të vërteta të dukshme, me synimin për të krijuar dyshime.
Minimizimi i emocioneve
Ata i bindin partnerët se janë “shumë të ndjeshëm” ose po e ekzagjerojnë, duke i bërë të dyshojnë në ndjenjat e tyre të ligjshme.
Akuzat për tradhti
Shpesh projektojnë sjelljen e tyre, duke akuzuar tjetrin për mashtrim, kur në fakt ata mund të jenë ata që tradhtojnë.
Cikli kritikë-lëvdata
Pas kritikave të ashpra, vjen ngushëllimi dhe lavdërimi, duke krijuar një dinamikë konfuzuese mes dashurisë dhe zhgënjimit.
Sipas psikoterapistëve, këto modele nuk duhet injoruar, pasi me kohën mund të kthehen në abuzim të thellë emocional.
