Administrata amerikane ndan të njëjtat shqetësime me Kongresin lidhur me tensionet në veri të Kosovës. Kështu tha për Zërin e Amerikës një zëdhënës i Këshillit Kombëtar të Sigurisë.
Zyrtarët e qeverisë amerikane, duke përfshirë Shtëpinë e Bardhë dhe Departamentin e Shtetit kanë punuar ngushtë me partnerët e Bashkimit Europian, për të gjetur një zgjidhje diplomatike për ngjarjet e fundit. Me udhëheqësit e Serbisë e të Kosovës janë angazhuar për të nxitur shtensionimin e përqendrimin e ripërtërirë në zbatimin e marrëveshjeve të normalizimit të nënshkruara në fillim të vitit.
Normalizimi i marrëdhënieve, pjesëmarrja në proceset demokratike dhe respektimi i sundimit të ligjit do të kontribuojnë në qëndrueshmërinë e sigurinë në veri të Kosovës.
Në këtë mënyrë iu përgjigj një letre që një grup senatorësh demokratë dhe republikanë i drejtuan presidentit amerikan, Joe Biden, duke kërkuar që ta trajtojë me përparësi përkeqësimin e situatës së sigurisë ndërmjet Kosovës dhe Serbisë.
Një ditë më parë u mësua se një grup senatorësh amerikanë kërkoi që administrata e presidentit Joe Biden, t’i japë prioritet adresimit të situatës jo të mirë të sigurisë mes Kosovës e Serbisë. Në një letër që përmban firmat e tetë senatorëve demokratë dhe republikanë, shefi i Shtëpisë së Bardhë nxitet të shqyrtojë shitjet ushtarake, nëse dy palët nuk angazhohen lidhur me propozimin e Bashkimit Europian për shtensionimin e situatës.
Letra e tetë senatorëve amerikanë i bën thirrje Biden-it, “të ushtrojë presion diplomatik, për t”i dhënë fund krizës aktuale”. Letra përmend dhe nevojën e zbatimit të Marrëveshjes së Ohrit, që Kosova dhe Serbia arritën në muajin mars, me qëllim normalizimin e marrëdhënieve. Senatorët paralajmëruan rishqyrtimin e mbështetjes nga Kongresi, nëse Kosova dhe Serbia “dështojnë të ushtrojnë përmbajtje” e “të punojnë për shtensionimin e situatës së sigurisë”. Nga administrata Biden kërkuan të sigurojë një raport për Senatin Amerikan mbi situatën aktuale të sigurisë në veri të Kosovës.
