Këngëtarja Rita Ora po përballet me një tjetër konflikt me fqinjët e saj në veri të Londrës, lidhur me planet për të ndërtuar një palestër në oborrin e pronës së saj historike, të blerë në vitin 2021 për 7.5 milionë paund (8.6 milionë euro).
Pas prezantimit të projektit nga arkitekti i saj, një grup banorësh nga një bllok apartamentesh aty pranë kanë dorëzuar një ankesë të përbashkët, duke argumentuar se ndërtimi do të prishte qetësinë e zonës.
Në dokumentin e tyre, ata shprehen se banorët nuk duhet të detyrohen të jetojnë me ndriçim artificial, zhurma të amplifikuara apo humbje privatësie.
Fqinjët theksojnë se, edhe pse projekti përfshin izolim akustik, dyert e mëdha rrëshqitëse të palestrës sugjerojnë mundësinë e muzikës dhe zhurmës në çdo orë.
Ata kujtojnë gjithashtu ekzistencën e një rregulli strikt në një pronë ngjitur, që ndalon festat dhe grumbullimet e mëdha për të ruajtur paqen.
Një prej banorëve ka ngritur madje shqetësimin për ndikimin te fauna lokale, përfshirë ketra dhe dhelpra.
Nga ana tjetër, projekti i Ritës parashikon që palestra të jetë plotësisht e izoluar nga zhurma, megjithatë tensionet me fqinjët mbeten të larta.
