Një studim i ri po sfidon stereotipin se plakja shoqërohet domosdoshmërisht me rënie fizike dhe mendore. Sipas kërkimeve, qëndrimi pozitiv ndaj moshës mund të jetë çelësi për një jetë më të shëndetshme dhe aktive në vitet e mëvonshme. Studimi, i publikuar në revistën shkencore Geriatrics, ndoqi mbi 11 mijë persona të moshuar për rreth një dekadë. Rezultatet treguan se më shumë se 45% e pjesëmarrësve përmirësuan aftësitë njohëse dhe shpejtësinë e ecjes me kalimin e kohës. Përmirësimi ishte dukshëm më i madh tek ata që kishin një qëndrim pozitiv ndaj plakjes.
Në një qendër komunitare në Atlanta, shumë të moshuar po e dëshmojnë këtë në praktikë. Ata marrin pjesë në aktivitete si joga, vallëzim dhe not, duke qëndruar aktivë si fizikisht ashtu edhe mendërisht. Për ta, sekreti nuk është një dietë apo suplement i veçantë, por një mënyrë e shëndetshme e të menduarit.
Studime të tjera mbështesin këtë ide. Një kërkim i vitit 2022 tregoi se personat mbi 50 vjeç me kënaqësi më të lartë ndaj plakjes kishin 43% më pak rrezik vdekjeje nga çdo shkak, si dhe më pak sëmundje kronike. Ndërkohë, një studim i vitit 2023 zbuloi se mendimi pozitiv lidhet me më pak probleme përqendrimi.
Ekspertët shpjegojnë se optimizmi rrit vetëbesimin, përmirëson kujtesën dhe nxit lidhjet sociale, të cilat janë thelbësore për shëndetin. Gjithashtu, njerëzit pozitivë kanë më shumë gjasa të kujdesen për shëndetin e tyre dhe të ndjekin kontrollet mjekësore. Mesazhi është i qartë: mosha është më shumë një gjendje mendore sesa një kufizim fizik.
