Nënsekretarja amerikane e Shtetit, Victoria Nuland përsëriti kërkesën e Shteteve të Bashkuara të Amerikës drejtuar Kosovës dhe Serbisë lidhur me nisjen e zbatimit të Marrëveshjes së Ohrit. Nuland foli pas një takimi me të dërguarin e Bashkimit Europian për dialogun mes Kosovës e Serbisë, Mirosllav Lajçak. Gjithashtu, zyrtarja e Uashingtonit theksoi se Shtetet e Bashkuara të Amerikës përkrahin “planin trepikësh të Bashkimit Europian, si mënyrën më të mirë për të zgjidhur krizën” në veri të Kosovës.
Pleased to welcome old friend EUSR @MiroslavLajcak. We urge Kosovo and Serbia to de-escalate tensions immediately and begin implementing Ohrid commitments. We continue to support the EU three-point plan as the best way to resolve the crisis. pic.twitter.com/ZT4pnaEYYd
— John Bass (@UnderSecStateP) June 21, 2023
Kosova dhe Serbia arritën marrëveshje drejt normalizimit të raporteve më 27 shkurt në Bruksel, si dhe u pajtuan për Aneksin e Zbatimit të saj në Ohër, në datën 18 mars.
Edhe Marrëveshja e Ohrit kërkon që palët t’i zbatojnë të gjitha marrëveshjet e arritura deri më tani në dialogun për normalizimin e marrëdhënieve, përfshirë atë për formimin e Asociacionit të komunave me shumicë serbe në Kosovë.
Por, situata në veri të Kosovës, zonë e banuar me shumicë serbe është tensionuar që nga data 26 maj, ditë kur Policia e Kosovës ndihmoi kryetarët e rinj shqiptarë të Zveçanit, Leposaviçit e Zubin Potokut që të hynin në ndërtesat komunale. Serbë lokalë kanë protestuar që nga ajo ditë.
Në lidhje me situatën në veri, komuniteti ndërkombëtar i ka shprehur tre kërkesa kryeministrit të Kosovës, Albin Kurti. Një prej tyre ka të bëjë me shtensionimin e situatës atje. Dy të tjerat lidhen me mbajtjen e zgjedhjeve të reja dhe kthimin në dialogun për normalizimin e marrëdhënieve Kosovë-Serbi, të ndërmjetësuar nga Bashkimi Europian.
Në anën tjetër, Albin Kurti e ka prezantuar ditë më parë një plan pesëpikësh për uljen e tensioneve në veri.
Ndërkaq, i dërguari i Uashingtonit për Ballkanin Perëndimor, Gabriel Escobar paralajmëroi se tensionet mes Kosovës e Serbisë kanë “potencial të shndërrohen në konflikt rajonal”. Këto deklarata i bëri në një debat të zhvilluar nga Këshilli i Atlantikut në Uashington.
