Zgjedhja e parë e presidentit të SHBA-ve, Donald Trump, është gjithmonë diplomacia, por ai është i gatshëm të përdorë edhe forcën vdekjeprurëse të ushtrisë amerikane nëse kjo do të jetë e nevojshme. Kështu deklaroi zëdhënësja e Shtëpisë së Bardhë, Karoline Leavitt, gjatë një konference për gazetarët në Uashington.
Leavitt theksoi se vetë presidenti do të marrë vendimin përfundimtar lidhur me kursin e veprimit ndaj Iran. Ajo hodhi poshtë raportimet mediatike të ditëve të fundit, duke i cilësuar si të pavërteta.
“Kam parë shumë raportime mbresëlënëse gjatë 24 orëve të fundit që janë krejtësisht të rreme. Kushdo që spekulon në media, i fshehur pas një burimi anonim dhe pretendon se di çfarë mendon presidenti Trump apo çfarë vendimi do të marrë për veprime kundër Iranit, nuk ka asnjë ide se për çfarë flet”, u shpreh ajo.
Forca ushtarake dhe bisedimet në Gjenevë
Deklarata e zëdhënëses vjen në një kohë kur SHBA-të po vazhdojnë të grumbullojnë forca të konsiderueshme ushtarake në rajon, ndërsa të dyja palët përgatiten për një raund të ri bisedimesh në Geneva mbi programin bërthamor të Teheranit. Rezultati i këtyre negociatave pritet të ndikojë në masë të madhe nëse dhe kur presidenti amerikan do të urdhërojë goditje ushtarake ndaj Iranit.
Ndërkohë, sekretari amerikan i Shtetit, Marco Rubio, pritet të informojë drejtuesit kryesorë të Kongresit në Shtëpinë e Bardhë më vonë gjatë së martës, sipas Departamentit Amerikan të Shtetit.
Më 19 shkurt, Trump deklaroi se i kishte dhënë Teheranit një afat prej rreth 10 deri në 15 ditësh për të arritur një marrëveshje.
