Forcat saudite kryen sulme ajrore ndaj objektivave të Houthive në qytetin portual Hodeida dhe në ishullin Kamaran, pasi rebelët shpallën bllokadë detare dhe sulmuan anije saudite.
Pak orë më vonë, autoritetet saudite lëshuan alarme emergjente për provincën Jizan, ndërsa Houthit morën përgjegjësinë për një sulm me raketa ndaj qytetit. Sipas mediave të grupit Ansarollah, goditja shkaktoi zjarre në zonë. Në një tjetër zhvillim, Komanda Qendrore e SHBA-së bëri të ditur se forcat amerikane qëlluan dhe nxorën jashtë funksionit një cisternë në Gjirin e Omanit, pasi ekuipazhi kishte tentuar disa herë të shmangte bllokadën amerikane ndaj porteve iraniane.
Sipas Pentagonit, anija u paralajmërua disa herë përpara se të goditej në dhomën e motorëve. Ndërkohë, Irani deklaroi se ka kryer sulme me dronë ndaj bazave ushtarake amerikane në Lindjen e Mesme, në përgjigje të natës së 13-të radhazi të bombardimeve amerikane. Presidenti Donald Trump deklaroi se bisedimet me Teheranin vazhdojnë, por paralajmëroi se SHBA është gati të intensifikojë operacionet ushtarake nëse nuk arrihet një marrëveshje.
Përshkallëzimi i situatës ka rritur shqetësimet për sigurinë e lundrimit në Ngushticën e Hormuzit dhe Detin e Kuq, ndërsa javën e ardhshme Shtetet e Bashkuara dhe Britania e Madhe do të zhvillojnë në Londër një konferencë të posaçme për sigurinë në këtë korridor strategjik detar.
