Ajo mënyrë e vogël si reagon kur partneri nuk të përgjigjet menjëherë, ose frika që ndonjëherë ndien kur ndihesh i/e injoruar — shpesh nuk lidhet me të tashmen, por me mënyrën si ke përjetuar dashurinë në fëmijëri.
Një studim ndërkombëtar i botuar në “Journal of Research on Adolescence” e konfirmon këtë: marrëdhënia me prindërit është themeli mbi të cilin ndërtojmë marrëdhëniet romantike më vonë.
Kërkimi u zhvillua në tetë vende të ndryshme dhe analizoi 311 adoleshentë. Rezultatet treguan se ata që kishin pasur komunikim të mirë, ndjeshmëri dhe siguri emocionale me prindërit, kishin më pak konflikte dhe më shumë kënaqësi në lidhjet e tyre romantike.
Ndërsa ata që kishin përjetuar tensione apo ftohtësi në familje, shpesh sillnin këto modele edhe në dashuri, duke pasur vështirësi në besim apo në ndarjen e emocioneve.
Psikologët e quajnë këtë “model lidhjeje emocionale” – një mënyrë e padukshme, por shumë e fuqishme, që ndikon në mënyrën si dashurojmë.
Lajmi i mirë është se ky model mund të riformohet. Vetëdija, terapia, dashuria e ndërsjellë dhe përkujdesja mund të ndihmojnë të çlirohemi nga plagët emocionale të së shkuarës dhe të ndërtojmë një mënyrë më të shëndetshme dashurie.
