Një studim i ri i publikuar në “Proceedings of the National Academy of Sciences” ka zbuluar se truri i burrave tkurret më shpejt se ai i grave me kalimin e moshës. Megjithatë, ky ndryshim nuk e shpjegon plotësisht pse gratë kanë më shumë gjasa të preken nga sëmundja e Alzheimerit, theksojnë studiuesit.
Kërkuesit analizuan mbi 12,000 skanime të trurit nga rreth 5,000 persona të shëndetshëm, të moshave nga 17 deri në 95 vjeç.
Secili pjesëmarrës iu nënshtrua të paktën dy skanimeve MRI, për të matur ndryshimet në vëllimin e trurit me kalimin e kohës.
Sipas autores kryesore, Anne Ravndal nga Universiteti i Oslos, studimi synonte të kuptonte nëse procesi i plakjes ndikon ndryshe te burrat dhe gratë, duke qenë se mosha është faktori më i madh i rrezikut për Alzheimerin.
Rezultatet treguan se truri i burrave pëson tkurrje më të shpejtë, veçanërisht në rajonet që lidhen me kujtesën, emocionet dhe përpunimin shqisor — si hipokampusi dhe zona parahipokampale.
Ndërkohë, tek gratë u vu re një stabilitet më i madh i strukturës së trurit, edhe pse pati një zmadhim të lehtë të barkusheve (hapësirave të mbushura me lëngje të trurit).
Sipas Ravndal, plakja normale nuk mjafton për të shpjeguar pse gratë preken më shpesh nga Alzheimeri. Ajo sugjeron se faktorë si jetëgjatësia më e madhe, ndryshimet hormonale dhe kujdesi ndaj shëndetit mund të kenë një rol të rëndësishëm.
Studiuesit theksojnë se kërkimet e ardhshme do të përfshijnë edhe persona me demencë, për të kuptuar më qartë mekanizmat biologjikë që ndikojnë në këto ndryshime gjinore.
